Tabata na final di maart Parlamento di Aruba a aproba e presupuesto pa aña 2020, como tambe autorisacion na Gobierno pa bay fia 1.3 biyon di florin. Mientras cu resto di economia ta practicamente inactivo, Gobierno a pidi Parlamento un ‘carte blanche’ den presupuesto 2020 sin cu a reduci su gastonan y manteniendo operacion di Gobierno manera cu ta business as usual. Por corda e tempo ey cu fraccion di AVP, principalmente parlamentario Sr. Richard Arends den su disertacion, a indica cu aunke ta apoya e sosten financiero pa esnan afecta, nan a adverti cu e cuadro financiero mester a wordo presenta den fase, bou criterionan specifico y supervision estricto.
Parlamentario Richard Arends a sugeri e prudencia den e presupuesto pa asina Hulanda coopera mas liher. Te cu awe Gobierno a ricibi financiamento pa un prome fase di 43 miyon di florin so y no tin miras pa por logra financiamento pa henter e deficit di 1.3 biyon di florin manera cu Gobierno di Aruba a pidi inicialmente na Conseho di Minister di Reino despues cu e presupuesto a wordo aproba. Awe CAFT ta conseha pa traha e presupuesto di nobo confirmando cu e presupuesto manera aproba no ta realistico.
Sr. Arends a argumenta cu den e presupuesto a aplica parcialmente un scenario calcula pa Banco Central mirando cu nan no a reduci su gastonan compara cu e presupuesto inicial; tampoco a presenta un plan di likides di e fondo di seguro medico (AZV), ni di e fondo di seguro social (SVB); y a presupuesta inversion na valor di 40 miyon di florin, pero no a duna un indicacion di ki tipo di inversion ta papiando di dje, ni den ki termino. Menos actividad economico ta resulta den menos empleo y esaki ta resulta na su turno na menos contribucion pa e fondonan di SVB y AZV poniendo e pensioen di nos grandinan como tambe e seguro medico den peliger.
Probablemente e efectonan di e crisis lo ta mucho mas grandi y den tres luna turismo lo no ta na mesun nivel di prome cu e crisis. Sinembargo ta necesario pa demostra cu ta tene cuenta cu tur scenario na momento di pidi cooperacion pa financiamento y tambe mester reduci gasto den forma substancial. Durante tratamento di presupuesto Parlamentario Richard Arends a subraya e hecho cu implementacion den fase lo agilisa e proceso di aprobacion den Conseho di Minister di Reino, pasobra pa por subi mercado internacional of pa por fia di Hulanda bo mester di e aprobacion ey. Gobierno no a tabata tin oido pa e recomendacionan aki y awe CAFT ta instrui Gobierno pa den dos siman presenta un prespuesto di nobo.
Parlamentario Arends a hasi un yamado na Gobierno cu e sosten financiero mester yega unda e mester yega y e mester ta efectivo. Despues di e prome tranche ta solamente 20% di esnan cu a aplica pa FASE a bin na remarke, como tambe a sosten financiero pa empresanan mediano y chikito. Un grupo hopi grandi, especialmente trahadornan independiente, no ta bin na remarke ni pa e 950 florin, ni pa 4000 florin y mucho menos pa e loonsubsidie. E loonsubsidie na balor di 49 miyon di florin cu a wordo aproba recientemente pa Conseho di Minister di Reino, no ta forma parti di e presupuesto.