Na ocasion di Dia di Labor unda nos ta keda recorda e lucha di trahadonan pa logra husticia social cu derechonan laboral basa riba igualdad y progreso, e Dia di Labor e aña aki ta uno increiblemente dificil y cu desafionan grandi pa henter nos Pueblo trahador.
Cu e menasa grandi sin precedencia den historia cu e crisis di Corona Virus a trece como consequencia cu ne, COVID 19 a menasa salud, bienestar y futuro di henter mundo y sin duda tambe di nos Pais y Pueblo.
Aruba y nos Pueblo ta bibando momentonan sumamente dificil y nunca antes bisto. Turismo ta morto, nos economia local ta practicamente morto, entradanan di Gobierno ta cayendo drasticamente poniendo e stabilidad financiero di Gobierno na peliger. Un crisis nunca antes bisto.
Un menasa riba nos bida manera antes nos a conoce, Gobierno di Aruba a tuma e decision cu nos mester busca tur manera pa sigura e salud y sobrevivencia di henter nos Pueblo sin excepcion.
Gobierno a tuma e decision difici di implementa e medidanan di LOCKDOWN y SHUTDOWN cu ta medidanan sumanente drastico pero alavez sumamente necesario pa sigura e salud di henter nos Pueblo.
Gobierno a tuma e decision pa introduci e FONDO DI ASISTENCIA SOCIAL DI EMERGENCIA FASE pa yuda tur cuidadano cu a perde nan entrada.
Gobierno a tuma decision cu ta bin cu LOON SUBSIDIE /SUBSIDIO DI SALARIO pa apoya companianan mantene trahadonan na trabao y cu un salario suficiente bao di e circumstancianan aki.
Gobierno a tuma e decision pa yuda e companianan chikito y mediano cada 3 luna pa nan por paga nan gastonan pa nan por sobrevivi.
Gobierno a tuma decision pa tur trahado entrega un parti di nan salario y beneficionan pa asina nos sigura cu tur hende por mantenene un salario y un biba envista cu den sector priva tin alrededor di 37.000 trahador ta perdiendo nan trabao.
Un linea cora cu nos por mira den e historia aki ta: TRAHADONAN ATRAVES DI SOLIDARIDAD LABORAL, ATRAVES DI SACRIFICIONAN, TUR TRAHADO TA MANTENE SIGURIDAD LABORAL. E MOMENTONAN AKI TA SUMAMENTE DIFICL, PERO E MOMENTO TA YEGANDO PA NOS POR PONE E CAPITULO DIFICIL AKI PA PASADO. LAGA NOS MANTENE NOS FE CU FORZA INQUEBRANTABLE PA ARUBA VENCE Y PA ASINA NOS COMO PUEBLO HABRI UN CAPITULO NOBO DEN E BIDA NOBO CU HENTER NOS PUEBLO TIN DERECHO RIBA DJE CU UN FUTURO NOBO BRIYANTE BRIYANDO NOS CAMINDA DI FUTURO.
