Actualmente Aruba ta den un crisis cu henter mundo ta den, nos ta saliendo di e crisis di e virus y a drenta den un crisis economico, cu nos niun no tin culpa y no por haci nada pa evita esaki. Nos economia ta draai na casi zero, nos a perde actualmente nos entrada principal cu ta bin for di turismo, tur dia Aruba ta perdiendo miyones di florin cu lo mester a drente di e sector turistico.
Casi tur negoshi ta cera, hotelnan ta cera, trahadornan ta na cas, algun trahado ta traha mitar dia pa nan tur por cobra algo ainda. Nos ta den un situacion hopi tristo, pa motibo cu un gran cantidad di trahado local ta na cas y tin cu tin hopi suerte cu nan doño di trabou ta dunanan mita salario, pero tin hopi cu negoshinan a cera y no tin entrada mas.
Gobierno a cuminsa tuma medida caba cu lo corta den salarionan di Minister cu 20% y a pidi cooperacion di ambtenaarnan pa tambe coopera den esaki, door di entrega 5% di nan salario, tambe mita di nan vakantie uitkering, mita gelijkbedrag y reparatietoeslag, esaki no a cay den bon tera cerca e sindicatonan y nan a manda un carta pa Hulanda cu 20 punto y tambe den e carta nan lo a pidi cabes di Ministernan Plenipotenciario.
E funcion di Minister Plenipotenciario ta un funcion cu ta data for di tempo cu Aruba tabata forma parti di Antiyas Hulandes caba, cu tabata Minister Plenipotenciario di Antiyas Hulandes y Vice Minister Plenipotenciario di Antiyas Hulandes.
Na 1986 Aruba a haya su Status Aparte y nos a conoce nos prome Minister Plenipotenciario di Aruba, cu tabata Sr. John Merryweather dfm.
Un Minister Plenipotenciario ta representa Aruba na Hulanda durante Rijksministerraad y tambe na diferente evento, reunion y actonan oficial na Hulanda. Tambe varios biaha e sa wordo yama pa Rey pa duna cuenta.
E puesto di Minister Plenipotenciario ta hopi importante pa Aruba pa tin su representante na Hulanda durante reunionnan den cual desicionnan importante ta wordo tuma pa cu nos isla. Tambe inversionistanan sa acerca Minister Plenipotenciario pa inversionnan pa Aruba. E Minister Plenipotenciario ta wordo apunta pa cada termino di un gobernacion. Pesey locual sindicatonan ta pidi ta algo cu no ta usual, pidiendo pa kita un persona sin un motibo valido for di un funcion cu ta asina importa pa nos isla.
