Hulanda – Corte superior Hulandes a duna su huicio diamars atardi riba caso di eutanasia pa persona sufriendo di demencia avansa. E caso tawata ensera e maneho riba esnan cu a haci un peticion pa eutanasia momento cu nan tawata den bon estado mental y cu despues a resulta di no kier continua cu e procedura.
E decision tuma pa e corte superior ta significa cu dokternan lo no por enfrenta persecucion si nan haci eutanasia riba pashentnan cu a expresa un cambio di pensamento. Pues dokternan por sigui cu e procedura di eutanasia apesar cu un pashent ta expresa cu e kier sigui biba.
E caso aki a cuminsa despues cu un dokter di cas a haci eutanasia riba un señora di Den Haag di 74 aña. Prome cu e señora a bira severamente dement, e a scirbi claramente cu e no kier sigui biba si su enfermedad yega di bira asina extremo. Momento cu su eutanasia mester a bira un realidad e señora a protesta fuertemente.
Prome cu e procedura un sedante a wordo tira den e señora su koffie. Asina mes famianan mester a wanta y contene e señora pa e dokter por a continua cu e procedura. Corte e tempo ey no a haya cu e medico a actua robes. Fiscal a referi e caso pa e corte superior pa asina haya mas claridad riba e ley di eutanasia.
E sentencia a dicta cu un medico por continua cu un peticion pa eutanasia cu a wordo haci por escrito pa pashentnan cu a desaroya demencia avansa. Tin reglanan estricto pa eutanasia cu mester sigui, e pashent mester ta bou “sufrimento insoportabel y interminabel” y dos dokter mester ta di acuerdo pa haci e procedura.
E peticion mester wordo haci prome cu e efectonan di demencia afecta e abilidad di e pashent pa expresa su deseonan.
