Den kuadro di trabounan ku mester keda realisá pa asina ei komestibel por yega na esnan mas den nesesidat, Kuerpo Polisial a duna un man den repartishon di e diferente paketenan. Awe djarason 15 di aprel 2020, polis a tuma e promé paketenan na “voedselbank” i a kuminsá yuda ku destribushon na e famianan ku tabatin mas urgensia di esakinan.
E regisornan di bario ku ta stashoná na e diferente wardanan di polis a koperá ku trahamentu di un lista di famianan den mas nesesidat den nan área di kuido. Despues di a entregá e nòmbernan aki na S.O.A.W., a kordiná pa e famianan aki awe a risibí nan pakete di manera ku por kuminsá aliviá e situashon di alimentashon serka e siudadanonan aki.
Di e forma aki polis, konsiente di e nesesidat i urgensia pa kuminda riba mesa den diferente kas ku a bin ta sufri debí na Covid-19, a saka un man i yuda esnan ku ta dependé di gobièrnu i otronan den komunidat ku sí por sobreviví òf karga ainda ku e situashon. Den tur e esfuerso grandi ku polis ta hasi pa mantené òrdu públiko i sòru pa tur siudadano kumpli ku lei i kuida nan salú, e ta traha espasio tambe pa mustra su konbibensia ku esnan ku tin mester di yudansa den e momentunan difísil aki tambe.
