Durante Toque De Queda no ta permiti niun persona pa ta riba caya, cu excepcion di esnan cu a haci excepcion pa nan pa motibo di nan trabou.
Turibana, Noord: Dialuna den oranan di anochi, un dama pa motibonan desconoci tabata coriendo riba caya cu su auto, pa su malasuerte ela perde control den un bocht skerpi, ela baha caminda y a dal contra un di e tubonan di un cura di waya. Esaki lo a sosode un rato prome of despues cu TDQ a drenta na vigor. Despues di e impacto e auto a keda pega riba e tubo y e chauffeur no por a haci nada pa saca e auto for di riba e tubo.
E dama chauffeur enbes di a yama polis, a dicidi di yama un persona pa sali di su cas pa bin yud’e. E homber a subi caminda publico cu su auto, sin avisa Polis. Esaki ta algo estrictamente prohibi.
Na momento cu e homber a yega na e sitio pa yuda e dama, un patruya di polis a pasa y a nota dos auto riba caya. Mesora a bay atende cu nan, e dama y e homber cu a bin yuda e dama a keda deteni, pa motibo di no a respeta e ley di Toque De Queda.
Transportwagen di CEA a transporta nan pa warda di polis, caminda nan lo mester a presenta dilanti un Sub Fiscal pa ricibi un boet.
Semper en cuando si un persona ta envolvi den un boksmento of cualke problema cu auto riba caminda publico cu por paso net prome cu Toque de queda y e persona no ta logra yega cas prome cu 9’or. Semper ta miho pa tuma contacto cu polis avisanan di e situacion inespera, nan por conseha y por yuda unda cu por. E homber enbes di a core subi auto, mester a avisa polis di loke a sosode y pidi permiso pa bay busca e dama.
Esaki por a wordo evita, of sikiera e homber lo por a scapa di e detencion y boet.
Den cualke caso di emergencia mester yama Central di polis pone nan na altura di e emergencia, cu ta conta pa por ehempel, si un hende bira malo y e mester bay Eerste Hulp of Imsan, tambe si acaso mester busca remedi na Botica na Warda. Polis ta controla tur caminda rond di nos isla, no take chance, e boet ta mil florin y sigur den e tempo di crisis aki ta hopi dificil pa yega saca asina hopi placa.
