Durante reunion publico di Parlamento pa atende e tema di Corona Virus, parlamentario Alan Howell a indica cu por hiba e reunion den un ambito politico, humano of di Reino, pero e ta scohe pa bay riba e aspecto humano.
Presidente di World Health Organization (WHO) a avisa for di cuminsamento loke lo bay pasa na momento cu e virus aki bati na bo porta y cu mester prepara. P’esey e ta bisa cu e ta hopi contento con nos gobierno ta atendiendo e situacion y a pidi tur minister pa sigui atende e situacion asina, pa sigui ta calmo y sigui scucha di pueblo. Tambe a encurasaha gobierno pa tuma medidanan drastico, pasobra esakinan ta esunnan cu lo yuda scapa nos pais. “Awor no ta interesa ken e ta afecta riba nivel individual, awor loke ta conta ta nos pais, nos hendenan. Ta nos pueblo, nos hendenan humilde ta bin prome”, Alan Howell a declara.
Den e cuadro aki el a puntra Minister di Asuntonan Social con a para cu esnan cu nan bijstand a wordo blokea? A puntra Premier si por mira e posibilidad pa evita rijnan largo pa paga awa y coriente, y mas bien duna e chens pa hendenan por paga nan cuenta despues, promoviendo asina e ‘social distancing’.
Finalisando Alan Howell a pidi Aruba pa uni y keda trankilo, pa obedece y asina nos gana e guera contra e virus aki y pa nos isla y nos hendenan bolbe florece riba tur nivel.