Gobierno di Aruba hunto cu Directie Volksgezondheid Aruba (DVG) desde cu e crisis di Corona Virus a drenta Aruba, den tur transparencia ta informa comunidad di Aruba dos biaha pa dia di tur desaroyo di e virus aki den nos pueblo.
Ultimamente, tin varios informacionnan falso cu ta sali for di tur skina di Aruba treciendo panico inecesario pa nos pueblo. Hopi ciudadano ta drenta panico tambe y bay luganan unda tin aglomeracion exponiendo asina nan mes tambe pa bin den contacto cu e virus.
Un audio en particular cu ta circulando rond ta esun cu ta bisa cu lo tin 40 caso di corona virus confirma na Aruba. Esaki ta falso. Tambe e audio ta bisa cu lo tin scarsedad di producto. Esaki tambe ta falso. E informacionnan aki ta djis pone e ciudadano desespera y bay malgasta placa cumprando yen di cos cu no mester mientras cu no tin scarsedad.
Gobierno ta haci un apelacion na tur ciudadano pa no drenta panico y cay den trampa di e noticianan falso aki. Sigui informacionnan di fuentenan confiabel. Tanto Gobierno di Aruba como DVG ta dunando updates tur dia 2 biaha pa dia pa asina Aruba por haya e informacionnan berdadero y necesario.
Corono virus no ta un wega. Por lo tanto, nos no mester haci wega cu esaki treciendo panico den pueblo enbes di curasha pueblo pa mantene nan mes na instruccionnan pa no sigui plama e virus. Nos ta den un tempo na unda nos pueblo mester ta uni pa un causa comun pa hunto nos combati e virus aki.
Gobierno di Aruba ta pidi cada ciudadano, cada mucha, hoben y adulto, pa encurasha otro pa keda cas. Encurasha otro pa respeta Toque de Queda. Encurasha otro pa respeta Polis. Hunto nos por Stop di Plam’e.