Oranjestad – Recientemente Minister di Cultura hunto cu personal di su Ministerio a asisti na un training ‘Educa cu Cultura’ presenta pa sra. Ghislaine Winterdaal, sra. Ruby Eckmeyer y sra. Ana Maria Hernandez.
Meta di e training ta pa un y tur ta bon informa tocante e aspectonan mas importante di un Maneho Integral di Cultura di un pais y cua ta e rol di cada persona den esaki.
E presentadonan a elabora riba e Maneho Integral di Cultura di Pais Aruba, cu a traha segun e Framework di UNESCO y CARICOM, den cualnan ta stipula con pa scirbi un Maneho Cultural.
E participantenan a ricibi informacion tocante di e vision, mision y metanan di e Maneho Integral di Cultura di Pais Aruba, e beneficionan ora cu ehecuta un maneho integral y e retonan pa futuro.
Alabes e trainernan a elabora riba e sectornan stipula den e Maneho Integral di Cultura di Aruba y su relacion cu e indicadornan manera menciona den e UN 2030 Agenda for Sustainable Development. Den e framework nobo di The Sustainable Development Goals (SDGs) cu a keda aproba na september 2015, tabata e prome biaha cu Nacionnan Uni a referi na e rol importante di cultura den e Agenda Internacional pa Desaroyo Sostenibel (Culture 21).
Lo bay duna e training ‘Educa cu Cultura’ tambe na otro departamentonan, instancianan, GO’s y NGO’s cu ta traha directamente of indirectamente riba tereno di cultura. Ta esencial pa tur esnan cu ta traha den ramo di cultura ta bon informa con pa ehecuta un Maneho Integral di Cultura. Despues cu e training “Educa cu Cultura” tuma luga, expertonan di Kennis Instituut Erfgoed Nederland (KIEN) lo ofrece tambe un training riba e Convenio pa Salvagruadia Patrimonio Cultural Inmaterial, special pa tur funcionarionan publico di maneho y personanan cu ta traha den ramo di cultura na Aruba.
Como e mandatario encarga cu cultura, Minister Maduro ta haya masha importante pa su persona hunto cu su personal por a sigui e training aki, pa asina su Ministerio ta bon informa tocante di e contenido di e Maneho Integral di Cultura di Pais Aruba. Minister di Cultura a gradici e presentadonan pa comparti e informacion valioso con na nivel internacional maneho di cultura ta standardisa y con UNESCO ta duna tur ingrediente (indicators) con pa traha cu Maneho di Cultura. E training ‘Educa cu Cultura’ sigur ta recomendabel pa e desaroyo sostenibel di nos pais.
