Nos pais ta pasando den momentonan dificil cuasa pa un situacion sin presedencia. Pa prome biaha den historia di nos pais, nos a cera frontera pa bishitantenan, cortando asina den e ader principal di nos economia. E decisionnan aki tabata sumamente dificil pa tuma. Den su discurso pa Dia di Himno y Bandera, Prome Minister Evelyn Wever-Croes a enfatisa cu Gobierno di Aruba ta haciendo tur posibel pa nos dushi Aruba sali miho posibel di e crisis aki.
“Como e Lider di e pais, como bo Prome Minister, mi kier sigura bo cu Gobierno di Aruba ta haciendo y lo haci tur lo posibel pa bringa e efectonan di Corona Virus, proteha salud di nos pueblo, especialmente esnan di edad halto of delicado di salud. Den crisis aki nos ta trahando cu un team profesional den atende crisis y temanan di salud, y nos ta wordo asisti pa organisacionnan internacional, manera RVIM y PAHO.
Ademas, Aruba ta conta cu un team di persona sumamente dedica y profesional den e area di cuido. Nos dokternan, enfermeronan, y tur esnan cu ta traha den e sector di cuido. Nos por ta hopi orguyoso di nan, y den nomber di Gobierno di Aruba y pueblo di Aruba, mi ta bisa boso danki di curason.
Nos ta trahando tambe riba un plan pa yuda e trahadonan cu perde trabou, y e doñonan di trabou cu nan negoshi ta wordo afecta. Lo no ta facil, sigur no considerando cu prome cu esaki, nos tabata tin caba hopi problema financiero. Sinembargo, nos ta buscando di tur forma pa por yega na fondo pa yuda esnan cu wordo afecta. E gesto di banconan pa tene cuenta cu e circumstancianan dificil aki, ta wordo hopi aprecia.
Nos ta haciendo lo posible y lo imposible pa combati e crisis aki. Futuro lo mustra si e desicionnan cu nos a tuma awe tabata esnan corecto. Pero mi ta convenci cu nos a actua y ta actuando y lo actua di acuerdo cu e miho consehonan, y cu nos consenshi na e luga corecto: ciudadanonan di pais Aruba. Mi ta pidi tur ciudadano pa coopera pa hunto nos bringa e virus aki hunto.
Den e ultimo dianan aki, den e crisis aki sin precedencia, mi ta puntra mi mes kico e crisis aki kier siña mi. Y mi no tin e contesta ainda. Pero mi ta pensa, talves e kier siña nos pa nos ta mas uni? Pa nos ta mas humano un cu otro? Pa tene mas cuenta cu otro?
Pa nos mustra curashi, hasta den un crisis asina grandi? Mi no sa, pero loke si mi sa ta cu nos ta un pueblo resiliente. Un pueblo cu a demostra den pasado cu nos ta fuerte, cu nos ta creativo, cu nos tin e espirito innovador.
Na aña 1985 Aruba tabata enfrenta e crisis mas grandi e tempo ey, drentando e Status Aparte cu ciere di e refineria. Nos a uni y nos a enfrenta e crisis ey, nos a demostra nos creatividad y nos espirito innovador y nos a desaroya nos pilar turistico, un di esnan mas exitoso den mundo. E mesun creatividad y espirito innovador lo yuda nos enfrenta y surpasa e crisis aki tambe”, Prome Minister Evelyn Wever-Croes a expresa.