Dia Internacional di Hende Muher ta un evento global cu ta celebra e logronan di nos hende muher, logronan riba e tereno social y politico. Mientras cu ta celebra esakinan tambe ta boga pa derechonan igual di genero.
Desde comienso di añanan 1900 ya por bisa cu algun tawata celebra e dia aki. Actualmente, esaki ta un evento anual cu miles ta celebra riba 08 di Maart.
E celebracion aki no ta uno mara na un organisacion, pero si ta trece instancia , compania, gobierno y hopi mas hende hunto tur aña. Riba e fecha special aki hopi charla, conferencia y tambe marchanan ta wordo organisa.
Con e dia Internacional di Hende Muher a cuminsa?
Na aña 1908, 1500 hende muher Mericano a marcha den e cuidad di New York pa asina demanda e derecho di voto, miho pago y tambe pa baha e oranan laboral.
Un aña despues, dia 28 di februari 1909 hunto cu e partido Socialista di Merca, a celebra pa prome biaha e dia Nacional di Hende Muher. Na aña 1919 señora, Clara Zetkin, lider di e ‘oficina di hende muher’ pa e partido Social Democrata di Alemania tawata di pensamento cu tur pais mester celebra e dia aki.
Zetkin a sugeri cu tur aña tur pais mester celebra dia di hende muher y asina duna oportunidad pa papia tambe riba e inigualdad di genero. Den un conferencia di mas di 100 hende muher di 17 pais, a porfin acorda na aña 1911 e ‘Dia Internacional di Hende Muher’.
Na inicio algun pais Europeo a celebra esaki riba 19 di maart, pero desde 1913 a select a 08 di maart como e dia. Ta te na aña 1975 cu Nacionan Uni (United Nations) a reconoce e fecha nan a cuminsa bin tur aña cu un tema di celebracion.
Na aña 2011 ex-presidente Barack Obama a proclama Maart como e luna dedica na historia di hende muher’, ‘Women’s History Month’.
Pakico ainda mester celebra (y recorda) e fecha aki?
Simplemente bisa, pa e mes motibo pakico a cuminsa cu e evento aki na promer lugar. Esaki tawata pa logra derechonan igual di genero pa tur muher na mundo, algo cu ainda no ta e realidad.
Ainda tin un descrepancia den pago di hende homber y hende muher (gender – gap). Hende muher ainda no ta representa igualmente den e mundo di business o politica. Globalmente, e cifranan ta mustra cu educacion pa hende muher, salud y violencia contra hende muher ta ainda pio cu di hende homber.
Segun e World Economic Forum, e ‘gender gap’ (descrepancia entre salario di hende muher y hende homber) lo sera na aña 2186.
Pues tur aña hende muhernan ta bin hunto pa celebra, pero tambe recorda y reconoce e inigualdadnan cu ainda ta existente.
Actualmente tin hopi mas conscientisacion riba e tereno aki.
E tema di e aña aki pa e Dia Internacional di Hende Muher ta #EachforEqual. Esaki ta pone enfasis riba e actonan di tur individuo pa lucha contra stereotiponan cu sociedad tin contra hende muher y pa celebra hunto e logronan ya cumpli.
Tin un ‘Dia Internacional di Hende Homber’?
Si, esaki ta tuma lugar tur aña riba 19 di november. E obhetivo di e dia aki ta pa focus riba salud di homber y mucha homber, mehora e relacion entre genero, promove igualdad di genero y tambe pa duna atencion pa e role models masculino.
E fecha aki ta un ocasion special pa homber celebra nan logronan y contribucionan, en particular nan contribucion na nan comunidad, famia, matrimonio y tambe cuido di muchanan.
Fuente: The Telegraph