Recientemente nos di FTA ta hayando basta pregunta for di nos miembrecia tocante nan derechonan na pia di trabou relaciona cu e amenaza inminente di e virus COVID-19, popularmente conoci como Corona-virus. Actualmente Aruba no tin niun caso registra (ainda) di e virus aki, pero teniendo na cuenta e hecho cu nos ta biba di turismo, ta mas bien un cuestion di tempo cu un of mas di nos bishitantenan cu ta bin for di paisnan cu si ta afecta caba pa e virus aki, lo trece nos den contacto cun’e.
Esaki logicamente ta trece preocupacion bou di nos clase trahador, specialmente esnan cu ta labora den sector horeca, kendenan ta esnan cu mas hopi tin contacto cu nos huespednan cu ta bini for di afo. Con leu dunadornan di trabou den e sector aki (hotel, casino, restaurantnan, etc.) ta obliga di tuma pasonan pa evita y limita e posibel traspaso di e virus na empleadonan?
Articulo 1614x inciso 1 di nos Codigo Civil ta stipula: “E dunador di trabou tin e obligacion di (entre otro) tuma e medidanan necesario pa evita cu e trahador ricibi daño como consequecia di eherce su labor.” Inciso 5 di e mesun articulo aki ta amplia e obligacion aki stipulando cu e dunador di trabou ta responsabel tambe pa otro personanan cu e ta laga haci trabou p’e sin cu e tin un acuerdo laboral directamente cu nan (pensa por ehempel riba contractors of uitzendkrachten).
A base di esaki menciona tur dunador di trabou, specialmente esnan den sectornan unda e peliger di exposicion na e virus ta mas halto, tin e obligacion legal di tuma tur medida necesario pa evita cu nan empleadonan ta wordo exponi na Corona-virus. Kico asina nos por compronde bou di esaki?
Esaki kiermeen cu e dunador di trabou entre otro mester inventarisa e risiconan pa cu e virus aki na su empresa y evalua esakinan. Aki por pensa riba preguntanan manera: con grandi e probabilidad ta pa exposicion na e virus, cua trahadornan ta core mas peliger y cual ta e posibel consequencianan. Siguientemente mester pensa riba e medidanan cu tin cu wordo tuma pa evita of minimalisa e risiconan aki.
En general por pensa riba medidanan manera:
– Tene sesionnan informativo cu e empleadonan den cual ta instrui nan riba con pa evita y minimaliza posibel contagio cu e virus aki;
– Pone materialnan disponibel na pia di trabou, specialmente den areanan di riesgo halto, cu ta mitiga contagio manera ‘hand sanitizers’, habon antibacterial, etc.;
– Duna acceso y oportunidad na empleadonan pa nan laba nan mannan regularmente durante oranan di trabou;
– Limpia y desinfecta areanan publico na e empresa regularmente;
– Ademas ta importante pa duna espacio pa empleadonan cu ta presenta sintomanan pa no presenta na pia di trabou pendiente confirmacion di contagio.
Como representante di empleadonan nos di FTA ta haya cu ta di sumo importancia pa empresanan tuma medidanan di prevencion di contagio cu e virus aki hopi na serio. Legal y moralmente tur dunador di trabou tin e obligacion pa proteha tanto e trahador como tambe e pueblo di Aruba en general.
