Minister Bruno Bruins (encargo di cuido medico) a duna di conoce diahuebs atardi cu un ciudadano Hulandes ta infecta cu e virus. Esaki a wordo haci por medio di un entrevista cu NOS nieuws. E prome caso di infeccion a bin despues cu un cabayero a regresa Hulanda for di un viahe na Italia.
Actualmente e prome pashent ta bou isolacion. E cabayero ta interna na un hospital den e cuidad di Tilburg. E persona aki lo a wordo contagia momento cu e tawata den e region Italiano unda actual tin un brote di e virus.
Ta papiando di e region norte di Italia, Lobardia, unda cu ja pa algun siman tin un brote andando di e Coronavirus y varios persona a keda bou cuarentena. E momentonan aki e meneer ta bou cuarentena na hospital, Elisabeth-TweeSteden Ziekenhuis (ETZ) na Tilburg.
E edad di e persona aki no ta conoci ainda. Mas detayes Minister Bruins no kier a duna. Awor investigacion ta wordo haci di tur e puntonan di contacto cu e persona lo tawata tin den e ultimo tempo.
E meta di e investigacion aki ta pa saca afor con hopi contacto y con serca e persona aki tawata rond di otro hende. Asina lo por saca afo ken lo mester tratamento o mester wordo poni bou cuarentena.
Esnan cu a bin den contacto cu e persona aki cu no ta mustra ningun sintoma di e virus lo wordo supervisa pa 14 dia, unda dos biaha pa dia lo mester check nan temperatura. Minister Bruins a termina su entrevista cu NOS mustrando basta preocupacion pa cu e situacion.
