Parlamentario Endy Croes a reacciona riba Marlon Sneek kende kier keda hiba e politica anticua di AVP y su lider Mike Eman, esta e politica di manipula henter un pueblo. Desde cu a trata e rapport Bo Aruba diabierna ultimo por a tuma nota cu AVP a haya nan den skina sin salida. Asina AVP strategicamente a manda Marlon Sneek su so e reunion y laga Marlon wanta e “biganan” pa Benny Sevinger y AVP.
Marlon: sordo, mudo y ciego
Rapport Bo Aruba a ilustra hopi cla con AVP a malgasta 1000 miyon florin na 241 proyecto y un cantidad di proyectonan a viola art 26 di ley di Contabilidad. Pregunta ta awor na Ministerio Publico con nan lo atende esaki. Mesun Marlon Sneek di AVP aki a sinta grita “voor” pa tur e bagamunderianan aki den Parlamento. Aruba a conoce un Parlamento silencia y desfuncional pa 8 aña largo. Awe Marlon kier critica maneho di e gobierno actual sin mira su mes den spiel y sin bin cu alternativa. Gobierno di Mike Eman – sostene pa e parlamentario “sordo , mudo, ciego” Marlon Sneek – ta complice y a actua como compinchi aprobando e desaster.
Abusando cu placa di pueblo
Un gobierno di AVP cu a presta 2000 miyon florin den 8 aña redoblando e debe di e pais aki. Un gobierno di AVP cu a redobla interes riba placa cu Mike Eman a presta unda na 2019 e gobierno actual mester a paga y a percura pa paga 232 miyon solamente na interes. Proyectonan PPP un otro 82 miyon pa aña pa 20 aña largo. Contractonan lucrativo pa amigonan di Marlon tanto Patrick Paskel y Speed kendenan a strica 7 miyon for di pais Aruba pa propaganda ken? Sjiemfat un total di 5.3 miyon na advies. Richard Arends y su Horizon Consultancy 4 miyon florin. Ruman di Mike Eman 1.6 miyon pa un solo auto di careda. Coordinadornan 142 miyon florin di pueblo na salario den 8 aña. Wubbo Ockels (dfm) 2 miyon, TNO y Phillips Lighting 10 miyon florin. Pues banda di a firma pa 1000 miyon na contractonan den Bo Aruba a malgasta tur e placanan aki.
AVP tabata mop cu cranchi habri
Ta manera gobierno tabata “mop” cu cranchi awa habri pero tur e awa tabata core bay y ta yena den cura di amigonan so. Unda Marlon Sneek tabata pa para e bagamunderianan aki? Esakinan a causa cu Aruba su debe a alcansa 90% y nos tabata na rand di bancarota. 5 aña pasa deficit di Aruba tabata 444 miyon y Mike Eman y AVP a haya un KB den teblachi riba su lomba y mester biba cune pa resto di su bida. Esaki hustamente pa mal maneho financiero y Hulanda a cay aden. Awe despues di apenas 2 aña di un gobierno drechi y responsabel por mira cu Aruba na 2019 ya caba a logra un Surplus pa finalmente pueblo por cuminsa paga debenan cu Mike a hinca nos aden. Marlon Sneek por pidi su coleganan cuminsa yega trabou y stop di cobra hortando e pueblo asina sin traha. Marlon Sneek por a sirbi pueblo si el a paga e bagamunderianan aki y por a scapa pueblo di e Mega Debe y e desaster financiero cu Boso a orkestra. Nos lo continua den siman pa asina pueblo compronde cu nunca pero nunca mas AVP por ta welcome pa dirigi e pais aki.
