Parlamentario pa fraccion di AVP, sr Robert Candelaria a mustra cu ultimo tempo por scucha cu maneho di husticia tin reto tras di reto, caminda hopi cosnan ta biniendo pa dilanti cu mester di atencion y decision rapido di e minister, mustrando cu di parti di AVP, tambe a trece diferente punto dilanti cu no ta canando bon den husticia y cu merece cambio urgente.
“Ta un cos pa trece puntonan di critica pa dilanti, y den e maneho di husticia lamentablemente tin hopi issues ultimo tempo pa nos adresa, pero mi ta kere cu tur storia tin e otro banda tambe. Manera mi sa bisa, den mi trabou mi ta trata semper pa bini tambe cu ideanan y sugerencianan positivo pa un Aruba mas safe y mas sigur.
KIA
Awe mi kier para un rato keto na nos prison. KIA ta un instituto cardinal den e cadena hudicial. E nomber mes ta bisa cu e ta un instituto coreccional. Esey ta nifica cu ora un persona wordo sentencia dor di Hues, e mester sinta su castigo den prison. Pero nos ta tuma nota cu esey no ta loke ta pasando den KIA actualmente, y esaki NO ta culpa di e profesionalnan cu ta traha eyden. E ta un trabou hopi duro pa tene presonan cera den un forma responsabel y segun norma- y leynan vigente. Na mes momento e intencion ta pa banda di mantene e presonan cera, mester traha tambe riba nan rehabilitacion pa evita cu nan lo bolbe haci e locual cu nan a haci y a cay un biaha mas cera p’e mesun cos.
Prioridad robes
Awor mi a yega di bisa cu e minister aki su prioridadnan hopi biaha ta robes. E ta scohe cosnan cu riba nan mes no mester ta malo, pero den un lista di prioridad nunca nan mester tabata number uno. E helicopter por ehempel no ta malo riba su mes, pero e no ta prioridad number uno.
E minister aki ta scohe awor pa bin cu un edificio nobo pa un prison. Riba su mes mi ta kere cu ta un bon idea pa bin cu un prison nobo pero den mi opinion, tin algo mas importante cu esey awor, cu ta mas trahado pa labora den KIA.
Ziekmelding
Mi ta compronde cu e retonan bou empleadonan ta hopi halto. Tin hopi ziekmelding y como consecuencia tin hopi overtime cu ta wordo traha na KIA. Esaki lo keda un circulo vicioso den trabou. Ora cu mas hende ta meld ziek pasobra di presion di trabou of cualkier otro motibo pakico nan kier mustra nan malcontento of precupacion, nan coleganan lo mester traha overtime pa yena e bashi cu e empleado malo ta laga habri.
Esey lo pone un presion mas halto riba esunnan cu ta keda traha cu lo resulta cu nan tambe ta haña mas y mas presion di trabou y meld nan mes ziek.
Klas nobo
Pues na luga di bin c’un prison nobo como e prome prioridad, mi ta pensa cu mester zorg pa tin empleado pa traha den e prison. Mester di wardado di preso, pero tambe otro profesionalnan pa traha cu e detenidonan pa yuda sigura cu nan a siña nan les y cu lo baha e riesgo di ripiticion.
PPP
Minister Bikker a papia den su presupuesto di aña 2018 cu e kier bin c’un prison nobo. El a scirbi den palabranan poco inusual con e kier financia e prison nobo aki. El a bisa cu:
“Er wordt nagestreefd om de bouw van een nieuwe penitentiaire inrichting zoveel mogelijk budget neutraal te gaan bekostigen door middel van aanwending van besparingen op vaste kosten van o.a. energie en water middels gebruik van duurzame technologie, tezamen met het huidige onderhoudsbudget, als basis voor een innovatieve en hybride financieringsvorm van Angelsaksische origine.”
Den e presupuesto di 2019, a bolbe referi den e texto na e mesun punto di spaar riba awa y coriente pa por financia e prison nobo. E biaha aki, despues di hopi pregunta y comentario di nos banda riba esaki, a laga e financieringsmodel PPP afo.
Idioma simpel PPP
Nos a hasi pregunta den pasado si e intencion ta, pa pone den idioma simpel pa tur hende compronde, cu kier financia e prison hasiendo uso di PPP? Pasobra mi ta kere cu niun hende por kere cu bahando gasto di awa y coriente so, ta suficiente pa financia un prison nobo.
Pro vs contra PPP
Pero proyectonan PPP ta algo cu e minister aki y su coleganan den gobierno actual a critica bastante ora nan tabata den oposicion. E minister tabata contra PPP ora e tabata den oposicion, pero awor cu e mes ta den gobierno, e kier haci uso di e mesun PPP pa traha un prison nobo. Remarcabel ta cu e gobierno di MEP prome, despues esun di AVP tambe a usa PPP pa financia proyectonan, cu den cierto caso manera esaki ta un bon forma pa financia proyectonan di e tamayo aki.
Laga nos spera cu e Minister usa e fondonan limita corectamente y presupuesta pa busca y educa mas profesional pa traha den KIA y no solamente focus riba un edificio nobo pa evita cu nos haña mescos cu ta pasa den polis awor, cu tin hopi auto y brommer, pero sin polis pa core riba nan. Nos kier un prison nobo berdad, pero cu suficiente empleado pa traha aden tambe,” Parlamentario Robert Candelaria a declara.