E aña aki atrobe, manera ya tabata e kaso den e último añanan, Ministerio Públiko huntu ku Kuerpo Polisial ta bolbe tene e akshon ‘Aktua Robes, Sintié un bes riba e dianan di e marchanan di Karnaval. Pa por garantisá órden públiko, polis lo aktua di forma severo kontra di violashonnan di tráfiko manera e.o. ponementu di fever òf hasi kualke maniobra ku por pone tráfiko den peliger, manehá un vehíkulo sin ku e dokumentunan di esaki ta na òrdu i/o sin ku e vehíkulo ta kumpli ku e eksigensianan tékniko manera e ordenansa di tráfiko ta preskribí.
Tambe lo aktua kontra di agreshon verbal i físiko manera e.o. menasa, intimidashon, maltrato ku òf sin arma, destrukshon i buracheria públiko. Personanan ku ta den posishon di arma òf ophetonan ku por wòrdu usa komo arma, tambe ta kai bou di e kategoria di personanan ku lo keda detené i prosesá pa hustisia, meskos ku poseshon ilegal di droga.
Tur persona mester ta den posishon di un tarheta di identifikashon bálido i mester mustra esaki na momentu ku outoridat pidié. Den kaso ku no por mustra esaki, lo bo por wòrdu detené. Esnan ku no sigui instrukshon di outoridat òf oponé i/o stroba outoridat den ehekushon di su funshon, tambe lo wòrdu arestá a base di e akshon aki.
Tur persona ku violá un di e echonan kastigabel aki riba menshoná, lo keda detené i hibá warda di reshèrshi. Einan, despues ku nan keda presentá dilanti di un fiskal (ouksiliar), nan lo haña e posibilidat pa hasi un transakshon. Den kaso ku e persona no por òf no ta deseá pa hasi un transakshon, su kaso ta wòrdu prosesá na e momentu ei via di un HuRa (Hustisia Rápido) òf e ta risibí un ‘dagvaarding’ pa presentá despues den korte.
SIRBI I PROTEHÁ
Ta bon pa menshoná, ku pa den kaso ku haña un persona ku un arma di kandela òf un kantidat supstansial di droga, ku esaki no ta kai bou di e akshon, pero lo wòrdu proseso di e forma komun i koriente.
Vehíkulonan ku keda konfiská durante di marchanan di karnaval, lo wòrdu entrega bek riba djaweps 27 di febrüari, despues ku e doño a kumpli ku tur e rekisitunan korespondiente.
Durante di e marchanan polis lo tene kontrol i lo listra personanan di forma preventivo, pa keda garantisá seguridat di tur hende.
Finalmente polis i Ministerio Públiko ke rekordá tur siudadano i prinsipalmente esnan karnavalista, ku a lo largu di e ruta kompletu di Karnaval, tin kámaranan di vigilansia ku ta wòrdu di monitor pa polis, pa protekshon i seguridat di abo siudadano.