E iniciativa pa rescata, restaura y renoba nos teatro di Ser’i Noka ya ta conoci pa hopi di nos habitantenan. Un noticia cu sigur a wordo ricibi cu hopi alegria y entusiasmo no solamente door di e habitantenan di Santa Cruz pero di henter nos isla. Hopi ciudadano ya a uni nan mes na e causa positivo aki pa proteha parti di nos herencia y rebiba un teatro cu tin un balor historico y cultural hopi valioso pa Aruba y nos futuro generacionnan.
Fundacion Go Cultura cu cooperacion excelente di Parokia di Santa Cruz ta haciendo tur esfuerzo pa e anfiteatro di Ser’i Noka por recobra su prominencia bek den nos comunidad.
Ta importante tambe pa nos balora nos raiz, aprecia nos cultura y reconoce nos historia. Pesey awe nos ta duna balor na esnan cu a crea un teatro unico, meymey di un naturaleza magico y encantador.
Nos historia ta sumamente importante pa yuda nos compronde y defini ken nos ta y di unda nos ta bin.
Den esaki, personanan visionario y creativo cu a hunga un rol importante den desaroyo positivo di nos isla ta para central.
Nos ta considera nan nos “heroenan local” cu nunca a traha pa wordo reconoci sino pa yuda eleva nos comunidad. Personanan extraordinario cu a bin hunto pa logra algo mas grandi cu nan mes.
Pesey awe nos ta pone den luz principal e personanan cu a soña, a tuma iniciativa y a cumpli cu nan meta noble pa duna cultura y creatividad un lugar mas prominente den nos comunidad pa asina awe nos tambe por tin un patrimonio nacional cu ta conociendo un era y desaroyo nobo den su existencia.
Manera cu ya nos a haci conoci den algun publicacion anterior, dos persona elemental den e inicio di e teatro di Ser’i Noka, tabata Sr. Piet Eelvelt y Sr. Domi Tromp.
Visionario y pioneronan creativo cu hunto cu Stichting Teatro Arubano y Mascaruba, a mira e posibilidad hopi cla pa construi un teatro den aire liber cu awe nos conoce como e “Teatro di Ser’i Noka”.
Un iniciativa cu a nace na principio di aña 1963 for di e deseo di Sra. Nena Vrolijk pa aporta na e celebracion di 100 aña di Parokia di Santa Cruz cu un obra teatral. E obra cu a pensa riba dje tabata un adaptacion na Papiamento cu a wordo haci na 1954 door di drs. R. G. Römer di e obra di tempo medieval: “Mariken van Nieumeghen”. E obra teatral aki cu primeramente a wordo presenta na Corsou durante december 1954 como “Mari di Malpais” y cu lo a wordo yama “Maria di Mahuma” na Aruba, a conoce un cambio den nomber, debi na e localidad caminda a scohe pa present’e, cu ta Ser’i Noka. Pues el a ricibi e nomber: “Maria di Ser’i Noka”.
Te cu awe, “Maria di Ser’i Noka” cu tabata e prome obra presenta den Teatro di Ser’i Noka, ta wordo comenta entre esnan cu a experencia su estreno riba 8 di december 1963.
Tambe ta sumamente importante pa menciona cu pa por a cuminsa y concretisa e trabaonan aki, tabata necesario pa un grupo di personanan capacita, dedica y sumamente balente bin hunto pa logra esaki.
Entre nan nos por menciona un baluarte di e pueblo di Santa Cruz cu ta Sr. Leonardo “Nadi” Croes.
Un persona cu tabata semper activo riba tereno social, deportivo y politico cu a haci masha hopi, no solamente pa Santa Cruz, pero pa nos isla en general.
Sr. Nadi Croes ta ser considera como un di e pilarnan den realisacion di construccion di Credit Union Santa Cruz, un lugar pa hopi feria. Tambe e tabata un motor tras di e realisacion di un kleuterschool pa Santa Cruz.
Sr. Croes tabata un politico activo for di 1949 te cu 1969 y tabata miembro di Eilandsraad. E ta autor di creacion di loke nos conoce awe como veld di Winston.
Bao guia di Sr. Nadi Croes tur e trabaonan pa cu e teatro di Ser’i Noka a tuma lugar, cu ayudo y apoyo di varios habitante di Santa Cruz cu tambe a coopera inmensamente na realisacion di e hazaña unico aki.
Tambe nos mester menciona nomber di Sr. Joe Werleman y Sr. Mario Croes cu tabata esnan encarga pa traha un dam (actual escenario di teatro di Ser’i Noka) y asina desvia e “rooi di awa blanco” y traha un rooi nobo cu ta pasa awor patras di e escenario di Ser’i Noka. Tur esaki nan a haci voluntariamente durante nan tempo liber.
Na mes momento ta importante tambe pa menciona nomber di Sr. Beto Werleman cu ta esun cu a percura pa na 1964, construi e “trapinan” pa asina e publico por a sinta.
Sr. Nadi Croes ta elemental tambe den construccion di e cruz di piedra riba un di e barancanan mas halto di Ser’i Noka. Un simbolo sumamente importante pa e bario di Santa Cruz.
Pastoor Jansen e tempo ey a aserca Sr. Nadi Croes pa traha esaki cu restonan di e imagen di estatua di Cristo Rey combina cu tur tipo di piedra di varios parti di nos isla, cristalnan y quartz blanco.
Cu sosten di Parochieraad, entre otro Sr. Ceril Wernet, Sr. Beto Werleman un bes mas, Sra. Mashi Angela, Sra. Florencia Lampe y Sr. Coby Croeze.
Y asina e cruz aki a wordo bendiciona y inaugura riba Bierna Santo, 12 di April 1968.
Esaki ta un ehempel bibo cu ora bo tin creatividad, vision, curashi y determinacion, bo por logra hazañanan positivo y impactante cu lo tin influencia riba miles di persona pa hopi generacion.
Nos ta sigur cu familiarnan di e personanan menciona den e texto aki ta sinti nan mes sumamente orguyoso di nan sernan keri.
Abo tin historia di “Ser’i Noka” cu bo ta desea di comparti cu nos?
Kizas potret, articulo di corant, video of simplemente anecdotanan interesante?
Sinti bo liber pa comunica cu nos na 5830808 of [email protected]
Fuente: Amigoe di Curaçao, delpher.nl y coleccion digital arubiana-caribiana
