ORANJESTAD, Aruba – Rumornan ta circulando cu na Aruba tin un posibel caso di Coronavirus confirma. Como Departamento responsabel pa salud di comunidad nos tin pa clarifica cu esaki no ta berdad.
Departamento di Salud Publico ta un organo transparente y profecional cu ta traha pa cuida salud di Aruba. Como departamento responsabel, nos lo no sconde ningun informacion pa nos comunidad. Un comunidad bon informa lo ta bon prepara pa cualkier situacion cu por presenta y esaki ta loke Departamento di Salud Publico ta haci, door di informa comunidad riba tur risico cu por presenta.
Pa e motibo aki cu nos ta invita pueblo di Aruba pa sintonisa nos conferencia di prensa programa pa mayan dia 28 di januari 2020 pa 8:30 di mainta unda nos lo duna un “update” riba e ultimo desaroyonan rond di Novel Coronavirus y con Aruba ta prepara pa esaki.