Diasabra 25 di januari, un dia nacional na unda cu pueblo di Aruba a celebra Dia di Betico y a conmemora su fecha natal. Betico lo a cumpli 82 aña. Sinembargo na un edad jong nos Creador a yam’e den Su Reino.
Prome Minister Evelyn Wever-Croes, durante su discurso na e ceremonia protocolar di Gobierno di Aruba riba Plaza Gilberto François ‘Betico’ Croes diasabra mainta, a elabora riba e bida di Betico y tur loke el a nifica pa nos pueblo.
“Betico tabata un persona humilde, cu un carisma enorme. Un persona mescos cu nos tur y toch mes momento un persona special, cu a logra cosnan grandi. Ya desde un edad hoben, el’a mustra e caracter di un Lider. Di un meneer di school el’a bira un politico y despues a comberti su mes den e politico di mas grandi cu Aruba a conoce den su historia, cargando e nomber tambe di Nos Libertador.
Masha poco pais den mundo a conoce un lider asina grandi y cu a logra cosnan grandi pa nan pais. Nos na Aruba SI a conoce un lider asina y pa esaki nos ta hopi agradecido.
Betico tabata tin un vision pa nos pueblo, pero manera nos tur sa, un vision sin accion ta keda solamente na un soño. Betico sinembargo a sa di converti e vision den accion, cu determinacion, a sa di uni nos pueblo, y asina a logra cosnan grandi pa Aruba.
Betico su palabranan legendario tabata “Si mi cay na caminda gara e bandera y sigui cu e lucha”. Despues di Betico, varios persona a gara e bandera y a sigui cu e lucha. Awor ta toca turno na nos generacion pa sigui cu e lucha pa mantene nos autonomia, pa gana respet y confiansa bek den Aruba y pa hiba nos pais y nos ciudadanonan padilanti.
Betico a demostra tambe e importancia di UNION. El’a sa di uni nos pueblo den e lucha pa Status Aparte. Su palabranan tabata: “Arubiano no ta solamente esun cu a nace na Aruba, sino tambe esun cu a haci Aruba su nacion. Y mi ta concuri completamente cu esaki. Awor nos pais Aruba ta para dilanti retonan grandi atrobe y mi ta convenci cu si nos UNI y enfrenta nan den UNION nos lo surpasa esakinan.
Betico a construi e cas, e hogar cu nos ta yama Aruba y ora e cas tabata cla, e mes no por a goza di dje pasobra el a fayece na edad hoben. Pero el a pasa nos e yabi di e cas cu yama Aruba, pa nos biba aden, pa nos lanta nos yiunan aden. Pa nos cuid’e, y pa nos percura pa bienestar y progreso di nos pueblo.
Pa mi ta un honor di por ta guia nos pais awe y e ta yena mi cu un sentimento profundo di orguyo, especialmente como sobrina y iha di Betico. Orguyo di a gara e bandera, y sigui cu e lucha. Mi ta haci un suplica na cada un pa ban sigui su ehempel. Traha duro. Sin temor pa sacrificio. Lucha cu integridad y honestidad pa hiba nos pais padilanti.
Nos pais ta enfrentando retonan grandi. Pero nos tin e VISION, e DETERMINACION y sigur e CURASHI pa surpasa e retonan aki. Un dia manera awe, esta Dia di Betico, ta brinda nos e oportunidad pa reflexiona, pa yena nos cu inspiracion, curashi, sabiduria y amor patrio pa atende cu tur reto y pa asina garantisa felicidad di e pueblo aki, locual Betico semper a anhela.
Na un di e scolnan cu mi a bishita durante siman, un hoben a puntra mi, “si Betico tabata na bida awe, kico bo lo a bise?’. Mi contesta tabata cu si Betico tabata na bida, lo mi a bise DANKI.
DANKI pa a lucha pa nos biba den un pais autonomo, cu nos propio Gobierno, nos propio Parlamento, den cual nos por tuma nos propio decisionnan.
DANKI pa a demostra cu maske Aruba ta un isla chikito, si bo tin vision y determinacion, bo por logra bo meta.
DANKI pa a inspira nos y pa sigui inspira nos, den kere den e idealnan di nos pais y di kier hiba nos pais padilanti.
DANKI pa a sacrifica su mes y su famia y a pone e interes di pueblo di Aruba, prome cu su interesnan personal of familiar.
Si mi lo por a bisa Betico algo, e lo ta DANKI, pasobra ta Danki na Dje awe nos por lanta nos yiunan den e dushi pais aki cu yama Aruba”.
Prome Minister a conclui su discruso gradiciendo tur esnan cu a lucha hunto cu Betico pa realisa nos Status Aparte. Un danki na politiconan cu den e añanan despues di obtene e Status Aparte a sa di lucha pa conserv’e. Tambe Prome Minister a gradici henter e famia di Betico kendenan semper a sosten’e y kendanan a haci hopi sacrificio hunto cu ne. Especialmente su yiunan, Guisette, Glenbert, Junior, Glendeline kendenan a comparti nan tata cu nos pueblo y a compronde cu Betico no tabata un tata pa un hogar so di mama, tata y cuater yiu, sino un tata pa henter Aruba.
Pa finalisa, Prome Minister Evelyn Wever-Croes a gradici nos Minister encarga cu cultura, sra. Xiomara Maduro y su ekipo, pa e bunita celebracion cultural diabierna anoch y pa e acto protocalar diasabra mainta na unda cu a surpasa tur expectativa. Un Pabien caloroso.
Aruba a celebra e dia aki na grandi y a demostra nos orguyo y nos amor pa nos pais. Pabien Aruba!
