ORANJESTAD – Un biaha mas nos isla a destaca den e premiacion anual di Hospitality Sales & Marketing Association International (HSMAI). Den un total di 10 categoria, e campañanan di mercadeo di Aruba a bay cu 2 premio di Platina, 7 premio di Oro, 2 di Plata y 2 di Brons. E reconocementonan aki ta merito pa e colaboracion exitoso entre Aruba Tourism Authority (A.T.A.) y nan agencia ‘The Concept Farm’ como tambe otro socionan envolvi.
Desde 1956, HSMAI Adrian Awards ta reconociendo pioneronan creativo y logronan den mercadeo. E premionan HSMAI ta premia e excelencia den mercadeo y publicidad a base di un criteria cu ta evalua e obhetivonan concreto, e strategianan y ehecucion innovativo; y con efectivo nan ta. E categorianan den cual Aruba a destaca ta inclui, entre otro, Integrated Marketing Campaign, Advertising Innovation, Webcast Series, Sweepstakes, Brochure Design y por ultimo Experiencial, cual ta un categoria cu a wordo introduci e aña aki.
E 2 premio di Platina ricibi pa Aruba ta marca e di 5 aña consecutivo den cual A.T.A ta logra e prestigioso premiacion Platina di HSMAI; un logro iniguala pa cualkier otro destino. Adrian Awards ta conoci como e competencia global den mercadeo mas grandi y prestigioso cu ta representa e mihonan den e mundo di e industria y A.T.A. ta sumamente honra y orguyoso cu e diferente reconocemento pa tur e esfuerso y creatividad treci dilanti.
Consciente di e dependencia grandi di Aruba riba turismo, A.T.A. ta busca pa semper destaca meymey di tur otro destino den Caribe y na mundo. Aplicando tacticanan progresivo y atractivo, ta logra capta atencion di e biahero y di e biahero potencial. Creatividad ta hunga un papel importante den e contenido y plataforma di entrega. Di e manera ey tin hopi concepto cu ta strategicamente diseña pa aumenta cantidad di bishita y loke nan ta laga atras den nos economia. Ta pa es motibo aki cu e dos campañanan esta ‘Aruba Goes Local in Grand Central’ cual ta concentra na New York y tambe e campaña di A.T.A. den colaboracion cu e beisbolista Arubiano Xander Bogaerts cu a wordo lansa na Boston.
E campañanan di publicidad y mercadeo di A.T.A. ta busca pa expone e atributonan mas atractivo di Aruba como destino turistico. Ya ta pa varios aña consecutivo cu Aruba ta entre e destinonan cu cantidad mas halto di premio HSMAI Adrian Awards. Mayoria di premio ta den e categoria digital y ta un refleho di e presencia solido cu Aruba tin den e plataforma moderno cu awendia ta esun di mas efectivo.
Entrega di premio a tuma luga e siman aki na New York. CEO di ATA, Sra. Ronella Tjin Asjoe Croes a expresa su satisfaccion pa cu e reconocimentonan ricibi y ta agrega “E premionan aki no ta solamente representa e experticio y dedicacion di e team di A.T.A y nos agencianan socio cu ta un parti integral di e mercadeo di Aruba, sino tambe ta demostra cu Aruba ta un ‘front-runner’ den e industria pa locual ta trata innovacion digital y e mercadeo creativo di Aruba como destino turistico”.
Di parti di Oficina di Turismo, Natasha Felix, un di A.T.A. su Business Development Managers na Merca, a ricibi e premiacionnan hunto cu Gregg Wasiak, socio y director na ‘The Concept Farm’.
