Conseho emiti pa CAFT riba presupuesto 2020 ta indica cu 111 miyon florin di entradanan presupuesta – casi 10% di e entradanan total – ta carece di base legal of decision cu ta hasi posible pa Gobierno por haña e entradanan aki, asina Parlamentario Richard Arends a mustra durante conferencia di prensa semanal di partido AVP. “No tin claridad ainda riba e 111 miyon florin aki ya cu e base legal pa por cobra esakinan mester wordo crea ainda. Mayoria di e suma aki ta forma parti di e reforma fiscal y otro decisionnan cu mester wordo tuma ainda. CAFT ta confirma den su conseho riba presupuesto 2020, cu e di dos fase di e reforma fiscal ta mescos cu e prome fase: simplemente un aumento di impuesto pa pueblo, comercio y turistanan sin cu Gobierno a reduci su gastonan di forma structural.
Segun e conseho di CAFT Gobierno ta conta cu un aumento di deviezenprovisie, cu BBO di 6% adicional riba e BBO di 6% existente na momento di importacion, como tambe un aumento di ‘toeristenheffing’ azotando Aruba su pilar economico. Ningun di e cambionan di ley aki a yega Parlamento ainda.
Tambe e conseho di CAFT ta remarka cu empresanan estatal lo mester cumpra e terenonan erfpacht unda nan tin nan facilidadnan y ekiponan. Parlamentario Arends ta hañ’e absurbo cu ademas di paga dividendo na Gobierno cu ta e unico accionista, Gobierno ta pone e empresanan aki cumpra e terenonan unda nan ta estableci. Esaki ta sin conta e extra dividendonan cu Gobierno ta sper di ricibi. Gobierno ta conta cu 60 miyon florin na dividendonan di e empresanan estatal y casi mita di e suma aki ta regarda dividendo extra cu gobierno a pidi. CAFT a indica cu a yega na nan conocemento cu cierto empresanan estatal lo cu a informa cu e gastonan adicional di compra di tereno y dividendo extra aki lo por afecta nan likides.
Den luna di december gobierno a formalisa benta y importacion di e cananbis oil, e asina yama CDB y a a bisa enfaticamente cu esey lo ta e unico forma di cannabis cu lo tin na Aruba pa uso medicinal. Pa tur hende nan sorpresa, Gobierno ta tene cuenta cu entradanan di licensianan pa produccion di cannabis aki na Aruba. Te cu awor no tin nada regla pa hasi esaki posible, no solamente pa e aspecto penal, pero tambe alocacion di tereno na unda esaki lo bay wordo cultiva y controla. Como cu e informacion aki a sali den medionan di comunicacion, lo ta interesante pa haya sa durante tratamento di presupuesto 2020 kico ta e condicionnan y for di ki fecha esaki a wordo duna.
Parlamentario a remarca cu hopi biaha ta e aspecto medicinal, social y penal ta wordo treci dilanti den discusionan publico pa loke ta trata legalisacion di cannabis. Sinembargo ningun hende ta papia ainda kico legalisacion di produccion di cannabis aki na Aruba lo nifica pa Aruba riba mercadonan internacional y e mundo financiero. “Esaki tin implicacionnan serio pa nos mundo bancario y cumplimento cu e sinfin di reglanan pa loke ta trata combatimento di labado di placa. Esaki ta algo cu no ta wordo subraya suficientemente,” Parlamentario pa fraccion di AVP, Sr. Richard Arends a mustra.