Cartera di Husticia tan anhela a bira e fracaso di mas grandi pa e Minister actual. Mientras atraco rond nos isla ta birando mas alarmante, e plan di maneho no ta algo cu ta existi. Preocupacion no solamente ta den comunidad pero den tur departamento di husticia. Prioridadnan ta completamente robes y e chaos ta creciente, strobando funcionamento optimal diario.
Mudamento di departamento di Recherche
E departamento di Recherhe di Playa ya no tin nan oficina for di augustus di aña pasa. No por duna e servicio y no por traha na un forma responsabel. Esaki ta un departamento grandi cu hopi rechercheur y tin e cantidad mas grandi di caso. Nos sa cu no ta fasil pa muda un bureau, pero despues di tanto luna di warda, awor si mester pone pia abou. Sindicato a pidi atencion, empleadonan a pidi atencion, pero te ainda no tin un solucion.
Warda di Playa no tin cel pa cera detenido
E cosnan aki no ta problema nobo, pero despues di mas cu dos aña na timon, nos ta echt puntra nos mes unda e prioridadnan ta di e minister, Robert Candelaria ta puntra. E polisnan mester hinca hopi mas tempo den transporta detenido cu tur e riesgonan cu esaki ta trece cun’e. Nos ta spera cu awor si a corto plaso por yega na un solucion pa e basico/minimo y nesesario. Ki bal cu tin un helicopter ta bula rond, si ni un bureau no tin pa traha na dje?
Sugerencia riba drone a haya oido
Nos a tuma nota tambe cu awor, despues cu nos a papia asina tanto tempo riba drone, cu awor minister a compronde kico e ta. Cu menos inversion di tempo y placa por logra hopi mas cu un drone cu por logra cu e helicoter pa patrouille y pa mantene nos pais mas safe y mas sigur. Nos ta contento di mira señal positivo pa con cu menos placa aumenta e eficiencia y traha riba seguridad real. Ohala e minister scucha mas biaha ora cu sugerencianan positivo keda manda den su direccion.
Nivel di politica / critica ora ta den oposicion / Henrencia cu ta ricibi y laga atras
Nos ta mira cu nivel di nos politica ta laga di desea.
Pueblo merece miho definitivamente. Mininister Bikker tabata un parlamentario critico y semper tabata pidi pa Dowers tuma retiro pasobra cu den su opinion Dowers no tabata funciona y e semper tabata gaba di su plan, su vicion, su manera pragmatico di resolve issues. Awor cu e ta minister, e ta ainda bezig cu Dowers, papiando di loke ela hereda. Mi ta kere cu e mester wak su herencia miho. Mi ta convenci cu ta danki na e herencia di Dowers ainda nos tin cabes riba awa den husticia. Banda di e helicopter, e verf riba un Bariopost y mudamento di visibility team, mi no por menciona nada cu Minister Bikker a implementa. Tristo cu e ehempelnan cu mi a menciona tampoco no ta adelanto pa seguridad di nos pais.
Robert Candelaria ta remarca cu ora ta den oposicion, no mester priminti cosnan cu bo sa cu bo no por cumpli cun’e. E lema di “campaña ta un y goberna ta otro” mester pasa pa historia. No mester priminti cu lo elimina atraco, pasobra esey no ta realistico. No mester priminti 200 polis mes ora, pasobra esey no ta realistico. No priminiti alarma den tur cas, pasobra tur esaki no ta realistico. Den oposicion, no mester exigi cu e mandatario mester baha tur ora y culpe pa tur atraco, pasobra ora bo ta riba e stoel bo mes ta confirma cu tur esaki ta mentira y ta proclama politica di antes. Ban cuminsa haci politica di un maneta critico pero limpi y realistico.
Awor cu tempo ta pasando, Minister Bikker mester cuminsa pensa riba loke realmente ela hereda. E mester cuminsa traha pa mehora loke no ta bon den su cartera y e mester hasi esaki lihe, pasobra pronto e ta laga un herencia atras. Di loke tur esnan den field ta mira y nos tambe ta observando, e herencia cu Minister Bikker ta lagando atras ta NADA bunita.