Fraccion di Movimiento Electoral di Pueblo, manera a bira custumber ta bishita scolnan basico durante e siman aki pa conta e historia di Betico.
Ta importante pa pueblo di Aruba completo realisa cual ta e berdadero historia di e gran estadista Gilberto Francois Betico Croes (q.e.p.d.) pa asina nos por traspasa e historia real di bida di Betico, su logronan y su lucha pa nos futuro generacionnan.
Como diputado Betico a trece cambio grandi y a converti su mes den un politico cu tabatin contacto directo cu su pueblo y a keda semper humilde.
Betico a dedica hopi tempo na enseñansa y durante su periodo como diputado a keda construi scolnan di Macuarima, Pos Chikito, mientras cu Colegio Arubano y John F. Kennedy a keda expandi. Tambe Betico a introduci e popular Bibliobus cu tabata pasa di scol pa scol y den tur districto. Asina Betico a percura pa stimula y brinda oportunidad na tur nos hobennan pa lesa y desaroya nan mente.
Danki na dje, danki na Betico Aruba a haya entre otro su propio Gobierno, Parlamento, Himno y Bandera, Ortografia y su propio moneda.
Como fraccion di Movimiento Electoral di Pueblo (MEP), e partido cu Betico a funda na aña 1971, ta un honor cu awe nos por a contribui na traspasa su historia y su lucha pa asina su logronan keda bibo den tur nos curason.
