Teheran, Iran: Dialuna mainta tabata tin un ceremonia di despedida na honor di e General Qassem Soleimani, kende diabierna ultimo a fayece na Bagdad, durante un atake di raket ehecuta pa Merca.
un multitud grandi di personanan a asisti na e ceremonia di despedida na Teheran
Segun e medionan di estado Irani, miyones di hende a subi caya pa atende e ceremonia den e capital di Iran.
Durante e ceremonia e yiu muher di Qassem Soleimani a hiba palabra y den su discurso e ta dirigi su mes na Merca y Israel, cu lo bay tin dianan scur nan dilanti.
E multitud a reuni prome cu 8’or di mainta den area di e Universidad di Teheran. E lider supremo, ayatollah Ali Khamenei, a dirigi un oracion na honor di e militar mas popular na Iran. E tabata zona basta emociona y tabata yora na e caha di Soleimani y e otro militarnan cu a fayece durante e atakenan ehecuta pa Merca. E ayatollah anteriormente a anuncia cu nan lo tuma revancha, pa e morto di Soleimani.
Ayatollah Ali Khamenei basta emocional
E dignitarionan Irani presente na e ceremonia
E multitud di personanan cu a bin presencia e ceremonia na Teheran, no tabata tin bandera di Iran so, pero tambe
por a mira banderanan Libanes y Iraki.
E hendenan tabata grita e slogan “morto pa Merca” y morto pa Israel”. Nan tabata haci un yamada pa tuma revancha pa e morto di e general. Diferente banderanan di Israel y Merca a wordo kima.
Durante e ceremonia a kima varios bandera di Merca y Israel
E yiu muher di e fayecido Generaal, Zeinab Soleimani a dirigi su mes na e multitud bisando cu “dianan scur lo bay tin pa Estados Unidos y su aliado Israel”. Ela yama Presidente Trump pa “loco” y a bisa: “kiko e ta kere cu tur cos a termina cu e martirio di mi tata.”
E ceremonia caminda miles y miles di hende a asisti por a wordo sigui live via e television di estado Irani. Varios otro dignitario tambe a asisti na e ceremonia di despedida di Soleimani.
Entre otro e Presidente Hassan Rohani, E presidente di e parlamento di Iran, Ali Larijani y e commandante Hossein Salami di e Guardia revolucionario di Iran.
Despues di e ceremonia di despedida na Teheran e curpa lo wordo hiba na Qom, caminda lo tuma luga un servicio conmemorativo. Diamars Soleimani lo wordo dera na su cuidad natal Kerman.
