Polis na Hulanda haciendo investigacion despues cu un agente policial a pone fin na su bida, e tabata wordo gepest door di colega.
Driebergen Hulanda: Recientemente Cuerpo Policial na Hulanda a cuminsa cu un investigacion despues cu algun dia pasa un agente policial a comete suicidio. E agente aki algun dia prome di a comete suicidio a keha na e Leiding cu e ta wordo hopi gepest.
E agente policial cu a comete suicidio tabata tin 31 aña di edad y ta biba na Driebergen. Dia 13 di December ela papia cu su superiornan den Cuerpo Policial. Dia 19 di December, ela dicidi di pone fin na su bida. Den e combersacion cu ela hiba cu Leiding, ela keha cu e ta wordo hopi gepest door di coleganan.
E agente tabata forma parti di e Landelijke Eenheid (LE), e tabata un Digitaal Expert, den e afdeling di Zware Misdaad en Terorisme. Segun su coleganan e tabata un experto den decifra codesnan den telefon di criminalnan.
Aparentemente un luna prome, e agente policial aki hunto cu mas colega, como 15 agente policial cu no tabata contento cu e ambiente na trabou, a entrega por escrito un keho na nan sindicato, tocante e abuso di poder den nan departamento, e vriendjes politiek, trekmento voor y un actitud no profesional di nan superior.
Segun vocero di polis tin un investigacion andando referente e pestmento y e comportacion di coleganan den e departamento. No por bisa ainda si e motibo di comete suicidio tin di haber cu e pestmento, esaki lo ta mucho recien. E investigacion lo mester saca afo si e suicidio di e agente policial aki tin un link cu e pestmento di coleganan.
Diabierna ultimo e agente policial a wordo hiba na su ultimo lugar di sosiego na Zeist.
