Oranjestad: Recientemente un dama a bay na un salon de beyesa caminda e sa bay caba pa algun aña pa haci manicure y cabey. Na momento cu e tabata haci manicure, ela mira nan ta drecha wenkbrauw di un otro cliente y ela puntranan si e tambe por haci’e, nan a bise cu nan ta usa Henna.
E dama a pone su pleno confiansa den e doño di e salon cu a haci su wenkbrauwnan pe. Pero su siguiente dia e area rond di su wenkbrauw a hincha y tabata haci hopi dolor, e no por a soport’e mas y a dicidi di bay dokter. Su dokter a bise cu ta un alergia e ta, ela haya remedi y dokter a bise pa bay puntra na e Salon cua producto nan a usa riba su wenkbrauwnan.
E dama enberdad a bay puntra na e salon y pa su sorpresa nan a bise cu no ta Henna pero ta Bigen nan a usa na su wenkbrauwnan, esaki a pone cu ela haya un reacion hopi serio na su wenkbrauwnan, specialmente cu prome cu nan a pone bigen nan a wax su wenkbrauwnan y su cuero tabata sentido caba. E dama a bay controla y enberdad riba e botter di Bigen ta poni bon cla cu Bigen no por wordo usa den area di wowo, paso e por afecta hende su bista y cu e hende por bira te hasta ciego.
E dama a bay bek cerca su dokter y a bise cu ta bigen nan a usa y no Henna. E dama a pasa algun dia di angustia pa motibo cu cada tanto ora e mester a bay dokter pa controla su bista. Ela keda casi un siman cu su cara hincha y hopi dolor. Ela recupera poco poco danki na e remedinan cu su dokter a dune. Aparentemente Bigen ta wordo usa na varios Salon na Aruba tambe y ta laga e clientenan kere cu ta Henna nan ta usando.
Den e entrevista por scucha mas detaya tur loke e dama aki a pasa den e ultimo siman aki. E dama den e entrevista aki kier alerta tur otro persona cu ta bishita salonnan de beyesa especialmente pa e dianan di fiesta, pa puntra prome bon tocante e producto cu lo wordo usa pa na nan cara, na nan cabey, si e ta enberdad pa uso na cara of riba cabey y asina evita cu mas hende por pasa den un experiencia asina amargo cu e dama a pasa den.
