ORANJESTAD – Dia 5 di december ultimo e compania di aerolinea AVIANCA a celebra mundialmente nan 100 aña di existencia cual por cierto por wordo admira e aña aki entre otro cu un avion retro cu ta bula for di Colombia pa varios destinacion globalmente. Na Aruba, den presencia di invitadonan, esaki a wordo celebra diamars dia 10 di december. Prome Minister Evelyna Wever-Croes a habri e evento cu palabranan di elogio pa AVIANCA, como tambe Pammela Flores – Regional Sales Coordinator di Avianca Centro America y Caribe y Joost Meijs – CEO di Aruba Airport Authority. Ronella Tjin Asjoe-Croes – CEO di Aruba Tourism Authority a hiba palabra durante e apertura, na unda el a elabora riba e importancia di e buelonan di Avianca pa Aruba cu ya ta bulando pa mas cu 36 aña pa nos destinacion. E aerolinea ta contecta no solamente Colombia pero e region di Latino America cu nos isla.
Avianca a inicia su operacionnan pa Aruba na aña 1983 cu un alrededor di 6.000 pasahero pa aña. Tawatin diferente iterinario bulando pa Aruba entre otro Bogota-Baranquilla-Aruba. Durante añanan nobenta cu e apoyo di Avianca, Aruba a habri su portanan pa otro mercadonan di Latino America entre otro Peru, Ecuador, Argentina y Brasil.
Entre aña 2000 pa 2002 Avianca tawata transporta mas cu 20 mil pasahero pa Aruba anualmente.
Apesar cu e introduccion di e Visa di Colombia pa Aruba na aña 2003, e aerolinea a continua di ta un socio ehemplar cu 13 mil pasahero pa Aruba.
Na aña 2015 a elimina e Visa y cu esaki e number di pasaheronan pa Aruba a aumenta cu 27 mil.
Awendia (2019), Avianca ta bula 11 biaha pa siman pa Aruba y por mira un incremento di aña 2000 pa 2018 di 107% pa loke ta e pasaheronan cu ta bula cu e aerolinea pa nos destinacion.
E aerolinea Colombiano Avianca no ta solamente un socio cu ta trece turismo pa Aruba, pero tambe ta uni famianan di Aruba y Colombia. Avianca ta hunga un papel clave den nos sector di salud cu tin mas cu 15 aña caba ta trahando cu AZV, ofreciendo su servicio pa transportacion di e siguradonan di AZV.
En general Avianca ta facilita e posibilidad di negoshi entre nos isla y e region, transportando grupo di empresa pero tambe esnan cu ta bin realiza nan conferencianan na Aruba y naturalmente pa e Colombianonan cu tin negoshi na Aruba mes.
Avianca ta posiciona su mes como e aerolinea lider cu ta transporta turistanan di e mercado Latino America pa Aruba, cu un market share di 30% na aña 2018.
Na final di su speech, CEO di A.T.A. Ronella Tjin Asjoe-Croes a ofrece Pammela Flores un bunita obsekio di parti di Aruba Tourism Authority, gradiciendo Avianca y alabes deseando nan hopi exito pa e añanan binidero.
Riba e potretnan por mira mas di e bunita gesto aki.
