Jaburibari: Diahuebs algo prome cu 9’or di anochi, presencia di polis y ambulance ta wordo pidi cu urgencia na altura di Tesco Supermarket na Jaburibari, pa un accidente semi frontal y cu herido.
Na yegada nan a bin compronde cu un pick-up oranje a sali for di e laundry pa bay direccion nort, e chauffeur di e pickup a sali dilanti di un Toyota Corolla cu tabata riba e caminda di preferencia, e dama chauffeur a reaciona mesora door di kita na su man robes pa no dal contra e pickup y a bay dal semi frontal contra un Nissan March cu tabata biniendo di direccion contrario.
E chauffeur di e pickup oranje, kende na prome instante a causa e accident, no a keda na e sitio y a sigui core bay manera nada a pasa. E polisnan na e sitio a bay mira riba e imagennan di e camara di seguridad di e Supermarket y enberdad nan a mira con e pickup oranje a sali dilanti di e auto y cu despues di e impacto no a para pero a sigui core.
Na un cas un poco mas panort di e Supermarket e polisnan a bin topa cu e pickup staciona dilanti di un cas, polisnan a hala atencion di e chauffeur di Pickup aki, pa motibo cu ela causa e accident y a sigui core bay.
E impacto tabata basta fuerte cu ambos chauffeur a keda levemente herida y mester a wordo atendi pa personal di ambulance.