Kuerpo Polisial di Korsou ta informa : Arma di kandela konfiská.

Den e kuadro pa kombatí kriminalidat i sigui halsa seguridat den nos komunidat, den oranan di atardi i anochi di Djamars 3 di desèmber 2019, e tim di Mantenshon di Òrdu Públiko, a tene kontrolnan preventivo. E kontrolnan aki ku a tuma lugá den Buena Vista, Otrobanda, Marchena, Wishi, Cas Chikitu, Sta. Helena i Julian, a keda dirigí riba infrakshonnan den tráfiko, pero tambe riba ilegalidat manera posishon di arma (di kandela) i droga. Durante kontrol den bario di Marchena na altura di Yuconweg e tim a kontrolá diferente vehikulo i persona. Na e sitio polis a topa ku un skuter ku probablemente e doño a bai laga atras. A resulta ku e skuter su dokumentonan no tabata na ordu i a transportá e skuter pa warda di polis. Durante di un kontrol riba e skuter na warda, polis a haña un arma di kandela outomátiko den baki di e skuter. Polis a konfiská e arma di kandela aki i e skuter pa mas investigashon. E kontrolnan aki lo kontinuá.