Tristesa ta ora bo constata con durante rueda di prensa di AVP un Robert Candelaria, kende mester lesa for di un papel cu nan a skirbi pe, ta purba ataca Rocco Tjon y purba hustifica su cobardia y manera e mes ta bisa: “wie met pek omgaat, wordt ermee besmet” y locual netamente ta pasando cu su persona. E motibo cu mi ta reacciona ta pasobra awo Candelaria ta purba tira culpa riba e amigonan nobo den parlamento cu awo ta presiona Rocco Tjon pa reacciona asina, cu ta otro desesperacion di AVP.
Wie met pek omgaat, wordt ermee besmet
Robert Candelaria no mester bay om cu pek pasobra e mes ta parti di e pek. Na momento cu bo ta scoge como e supuesto bon amigo di Rocco Tjon y ta laga otronan atacha su imagen treciendo cosnan cu bo sa cu no ta berdad, bo ta mescos cu esnan di AVP. Na comienso nos ta corda con Rocco Tjon tabata defende bo cu fervor pero manera nos a bis’e, na final bo lo wak ken ta bo amigo y awe realidad ta bati na su porta unda cu e persona cu el a considera como un amigo/un ruman ta laga su partido cu e ta afilia na dje lastr’e con cu e kier sin bisa nada pasobra e no por otro tampoco.
E unico politico cu a drenta politica cu garantia
Ora mi a scucha Candelaria bisa cu el a drenta politica pa traha pa Aruba ta un hilaridad di mas grandi cu mi a tende. Robert Candelaria ta e prome politico cu a drenta politica cu un garantia. Pa e por ta riba lista, AVP mester a percura pa su esposa haya trabao na Belastingdienst y pasa dilanti tur otro trahador cu tambe por ehecuta e mesun trabao. Banda di esaki a nombr’e tambe como director di Directie Scheepvaart Aruba y alabes a percura pa a paga su biahenan unda el a bin negosha su garantia. Y pa colmo Mike de Meza pa e lunanan di eleccion mester a pone riba payroll pa e por campaña y den dado caso si e no logra drenta parlamento y nan gana eleccion e tin su trabao garantisa como director di Scheepvaart. Y ainda bo kiermen bo a drenta politica pa traha pa Aruba? Ta pa bo saco bo a bin traha. Pa Aruba hamas y nunca.
Un partido politico afilia cu baho mundo
Candelaria ta cuestiona Rocco y su amigonan nobo pa tira lodo y persigui hende y bringa Hulanda. Rocco Tjon y su amigonan nobo ta para pa husticia y ta para fuerte contra Hulanda pa salvaguardia nos autonomia y cuida locual nos grandinan manera nos Libertador Betico Croes a lucha pe y ta nos deber di mantene. Robert Candelaria y su partido AVP hamas a para pa salvaguardia nos autonomia pero alcontrario semper a lucha pa entrega esaki bek na Hulanda y sigur Candelaria cu escogencia pa bay cu AVP ta muestra ken Candelaria ta pasobra ‘soort zoekt soort’, unda un homber cu mester para pa husticia ta miembro activo di un organisacion cu mas bien parce un organisacion mafioso afilia cu baho mundo y sigur cu corupcion y mal uso di nan poder.
Algun di e miembronan di AVP condena
AVP ta e unico partido politico cu su miembronan a ser condena manera ta e caso di ex minister Tico Croes condena, ex minister Paul Croes condena, ex minister Benny Sevinger awo acusa di 5 delito y tambe a drenta cas di ex politico di AVP Gaby Werleman den caso di Sevinger, amigonan den mundo di droga y corupcion deteni entre nan Carvajal, Rincon y tambe famia pega cu miembronan riba lista, ta indicacion cu AVP ta mustra mas bien un organisacion Mafioso. Netamente cu esakinan Candelaria ta afilia como un miembro mas y esaki su coleganan tambe te ainda no por caba di comprende con un ex Alto Comisario cu mester ta un homber para pa husticia ta afilia na e grupo aki di AVP y riba dje defende maldad tambe, ta haci mas bisto cu: Soort zoekt Soort.
Por ultimo nos tin di bisa cu si Candelaria ta kere di pretende cu e no a kibra un copi y cada bes nan pone papel pa e lesa pasobra e ta un mucha manda di Mike Eman, nos lo keda record’e cu e no ta mas cu un mas di e grupo considera mafioso den pueblo yama AVP. Banda di ta acepta tur maldad y sigur su atakenan infunda contra nos miembronan, nos lo keda record’e con sinberguensa e ta na momento cu e ta e unico politico cu a drenta arena politica cu un garantia unda cu pueblo di Aruba lo mester percura pa su sobrevivencia riba custia di e pueblo aki.