Un noticia cu a capta atencion di partido MEP ta e sentencia cu a cay contra sra. Aysel Erbudak – ex presidente di directiva di Slotervaartziekenhuis Amsterdam – kende dialuna ultimo a haya un sentencia di 15 luna di prison incondicional y un prohibicion pa ta director pa 6 aña y 3 luna algun otro condena mas. Primordialmente e sentencia ta basa riba algun cargo serio contra e señora aki, esta malversacion di 1.2 miyon Euro, falsificacion di documentonan, enrikecemento y declaracionnan contradictorio. Pues cargonan similar na loke nos por a experencia recientemente den e casonan corupto di Ibis (Paul Croes), Avestruz (Benny Sevinger) y pronto di Toteki (Mike Eman).
Maneho desastroso di Visser
Pakico MEP ta trece e sentencia menciona aki padilanti? Manera ta bon conoci caba sra. Erbudak ta esposa di ex-Minister di AVP, Richard Visser, kende durante 2009-2013 a haci un desaster den nos salubridad publico y en especial pa loke ta e maneho, construccion y renobacion di nos Hospital Horacio Oduber. Tabata danki na e maneho desastroso y corupto cu el a hiba, awe nos pais ta horca cu un debe di alrededor di 1 biyon florin cu mester wordo paga ainda den e proximo 29 añanan y cu un cost overrun di 110 miyon florin extra pa un hospital di mal calidad construi y caminda te hasta e minister encarga y su partido AVP a “lubida” di inclui salanan di operacion, cuido intensivo etc den e hospital aki. Pues un berdadero Hospital Gate cu ya ta na caminda y cu ta producto directo di e maneho corupto di Gabinete Eman y AVP!
Nombramento di director di HOH
Nos no mester lubida nunca cu tabata na 2017 durante gobernacion di AVP, e partido aki tabatin intencion di nombra e señora di ex-Minister Visser, esta señora Erbudak como director di Horacio Oduber Hospital. Tabata danki na e reaccion di pueblo y criticanan fuerte vocifera den prensa y medionan social cu finalmente e gobierno di AVP a deshaci di e idea y locura aki. Tur esaki mientras cu tur informacion tabata indica for di e tempo ey caba cu e señora aki tabata envolvi den varios caso dudoso y escandaloso y cual dialuna ultimo a ser confirma den Corte na Hulanda.
Pueblo por imagina kico lo a para cu e imagen, credibilidad y integridad di nos pais y en especial di nos Hospital – despues di e sentencia devastador contra Erbudak – si e señora aki toch a wordo nombra como director di nos hospital na 2017 y cu awe el a haya un castigo di 15 luna cera? Pues lo tabata un scandal riba un otro scandal den nos unico hospital y tur esaki pasobra nos pais a conoce un gobierno corupto di AVP cu nunca por ser gara den algo cu ta honesto y integro. Un biaha mas nos pais a salba di e maneho corupto implementa pa e regimen di Mike Eman y AVP.
