Parlamentario Endy Croes ta divulga e storia real di Mike Eman. Mike Eman ta un hipocrita di marca mayor ‘duele quien duele’. Despues di a desgracia e pais aki financieramente totalmente awe kier lobby y usa sindicatonan pa lanta pueblo pa asina e por bin bek na poder. Mike Eman durante 8 aña a presta 2200 miyon florin cual ta igual na 2.2 biyon florin. Pueblo, puntra bo mes si bo por mira e placa aki inverti den Aruba? Mike Eman a bin cu Bo Aruba unda tin un rapport riba mesa cu ta splica cu 1000 miyon florin (1 Biyon florin) a wordo aloca den proyectonan. Benny Sevinger a nenga pa contesta e preguntanan di Algemene Rekenkamer riba e rapport aki. Rapport ta papia entre otro cu no tin ningun dossier di e proyectonan.
Corupcion, fraude, ladronicia
Pa e rason administrativo coruptivo cu Mike Eman a practica awe Aruba ta pagando 232 miyon florin solamente na interes. Esaki ta mas di 600 mil florin pa cada dia. Tristo no? Nos debe nacional a crece bou di Mike di 43% di GDP pa 90% di GDP den apenas 8 aña di AVP. Pues 90 cen di cada florin ta bay na paga debe di Mike Eman y AVP. Esaki ta e direcion cu Aruba kier sigui bay? Un direccion di manipulacion, corupcion, fraude y ladronicia? Mike Eman a coy 142 mil florin di pueblo sin ningun decision di un Ministerraad “vooraf” y ta fiesta su cumpleaños riba brug dia 1 di september 2017 den porta di eleccion. Un empleado cu minimum loon mester traha 7 aña pa alcansa e suma aki.
Mike Eman a manda pueblo bancarota
Banda cu e maneho aki ta duna bo como ciudadano un tristesa enorme por conclui un sinberguensa of psicopata so y sin gevoel por usa placa di pueblo di e forma aki. Banda di tur esaki a mara Aruba cu proyectonan PPP unda awor den 2019 en adelante Aruba ta pagando 80.9 miyon florin pa aña pa 20 aña largo. Rapport di CAFT y protocol di 22 november 2018 ta splica cu na 2039 esta aki 20 aña Aruba su debe nacional lo baha di 90% y lo alcansa 50% rond di unda MEP a lag’e na 2009. Pues Mike Eman a manda e pueblo bancarota y tira nos 30 aña atras. Parlamentario Endy Croes ta haya prudente pa keda recorda pueblo con Mike Eman a maneha e pais aki. Kisas por tin fanaticonan cu no ta gusta pero esaki ta e puro berdad y pueblo tin derecho di haya sa.
Menosprecio pa votadornan
Despues cu Mike Eman a strangula e finansas di Aruba pueblo a castiga AVP y manda nan atras cu 10000 voto. Mike Eman a haya ta bon pa entrega su asiento y NO drenta Parlamento pa defende su votadornan y asina a menosprecia tur cu a duna AVP y e mes personalmente un sosten cu nan voto. Asina ta trata bo votadornan? Foei Mike! Awe despues di 2 aña kier colga na saya di sindicatonan pa purba bin bek na poder? E pueblo aki mester Lidernan cu curashi y determinacion pa saca Aruba for di e debacle cu Mike Eman a hinca nos aden. Esnan cu a desgracia e pais aki nunca por forma parti di e solucion. Pues nunca pero nunca mas por duna AVP un sosten di confiansa, Croes ta termina bisando.