Willemstad, Korsou: Den oranan di mardugá di djasabra 16 di novèmber 2019, alrededor di 02.29’or, Sentral di Polis a risibí yamada tokante di un hòmber den un vehíkulo riba Cubaweg ku tabata los tirunan den laira ku un arma di kandela . Mesora a dirigí un unidat na e sitio, ku a bin topa ku kashi di bala, pero e vehíkulo mes ya a disparsé.
Un unidat di Mantenshon di Òrdu Públiko ku tabata okupando su mes ku kontrol den Otrabanda, algun ratu despues, a nota e vehíkulo aki i mesora ku e shofùr a tuma nota di presensia di polis, el a hasi sospechoso i desviá e agentenan. E lo a maniobrá di tal manera, ku asta un agente mester a bula na kantu pa evitá ku e ta keda alkansá pa e outo aki. A kuminsá un persekushon tras di e vehíkulo i despues na pia. Na momentu ku e sospechoso, den área di San Mateowijk a baha for di e outo, el a dirigí e arma di kandela ku e tabatin den su poder riba e agentenan i nan a haña nan ta los algun tiru dirigí riba dje, di kua un di nan a alkanse na e parti drechi ariba di su kurpa. Den e besindario a bin konfiská mas lat un pistol, ku e sospechoso tabatin huntu kuné.
Na e sitio mes el a keda detené i ku ambulans el a wòrdu transportá pa poli sala di emergensia di C.M.C, pa tratamentu médiko i despues interná. Ta trata di e hòmber W.R.I. di 22 aña di edat nase na Venezuela. E sospechoso a keda presentá dilanti di un fiskal ouksiliar, ku a ordená su enkarselamentu pendiente di mas investigashon.