Desde april 2014 a instala un Taskforce Derecho di mucha cu ta consisti di un representante di tur isla den Reino y Hulanda. Den e plan di trabou di Taskforce a deliña algun aspectonan cu lo a atende di un forma colectivo.
Un di e aspectonan cu sigur kier promove den bienestar di e muchanan, ta e lantamento di mucha riba un forma positivo. Pa e motibo ey a palabra cu cada isla lo desaroya un vision pedagogico pa nan isla. Aruba na su turno a scohe pa desde april 2016 traha cu un comision, cu tin como tarea pa bin cu un vision pedagogico y un plan di accion pa Aruba.
E comision aki ta consisti di 5 diferente organisacion: Directie Sociale Zaken, Fundacion Pa Nos Muchanan, Stg. Wit Gele Kruis Aruba, Fundacion Respeta Mi, Tienda di Educacion.
E organisacionnan aki ta traha diariamente cu mayornan y tin como tarea pa sostene mayornan cu nan pregunta y problemanan riba tereno di lantamento di mucha. Pa formula e vision pedagogico, e comision a hasi uzo di diferente fuente di informacion, manera literature, entrevista cu hobennan, encuesta cu mayornan y profesionalnan, cifra di diferentie instancia y experiencia diario.
Finalmente a formula e seis (6) puntonan basico den lantamento di mucha. Pa medio di e seis puntonan basico aki nos kier consientisa e comunidad di Aruba den e proximo 2 añanan tocante e importancia di pone nos muchanan central, e importancia di e derecho di nos muchanan y di e papel importante cu mayornan y educadornan y henter nos comunidad tin den e lantamento di nos muchanan na Aruba.
E 6 puntonan basico ta:
- lanta yiu den un ambiente safe y amoroso;
- sosten positivo;
- expectativa realistico;
- disciplina positivo;
- cuida bo mes bon;
- busca sosten y ayudo.
A base di e 6 puntonan basico aki a formula un vision pedagogico pa Aruba. E vision pedagogico ta : Na Aruba un mayor ta percura pa nan yiu por crece den un ambiente pedagogico optimal, den un famia afectivo y safe y den un bario cu ta tene cuenta cu mucha. Pa medio di educacion positivo (sostene, stimula y guia) mayor ta guia nan yiu mas miho posibel den nan desaroyo pa bira adulto.
Hopi importante ta cu e mucha ta sinti siguridad emocional, ta desaroya su habilidadnan social y personal, ta haya chens pa siña balor y norma y hunga un rol activo den un comunidad multicultural.
Den e simannan cu ta bin Aruba lo wak un video promocional di e seis puntonan basico. Un total di mas o menos 15 organacionnan a uni na e campaña di promocion y ta yuda carga e vision. Desde aña pasa Aruba, mescos cu otro pais den Reino, a cuminsa pone atencion riba lantamento di mucha pa medio di e “Siman di lantamento di mucha”, loke nan ta yama “opvoedweek” na Hulanda.
Gobierno a scohe e siman dor cu e ta inclui e fecha 20 di november cu ta “Dia Internacional di derecho di mucha”. E aña aki ta conmemora 30 aña cu paisnan rond di mundo a firma e Tratado cu e meta pa proteha tur mucha na mundo. Aruba ta uni su mes na e causa aki y ta enfatisa riba e importancia di lanta nos muchanan den un ambiente di amor y siguridad.
Durante e siman aki lo tin diferente actividad, tanto pa mayor como pa mucha. E calendario di actividad tabata posibel danki na e diferente organisacionnan cu ta promove e vision pedagogico na Aruba y nan dedicacion na mehoracion di e bida di nos muchanan.
Sociaal Crisisplan ta mira e importancia den e trabou esencial cu Opvoedcommissie ta haci y ta yuda cu fondo pa haci tur actividadnan posibel. Ta importante pa nos muchanan y nan famia ta na altura di derechonan di mucha y e 6 puntonan basico pa cada mayor por lanta nan yiu den un hogar cu amor, cariño y respet. E siguridad y bienestar di nos mucha- y hobennan ta responsibilidad di nos tur.
