ORANJESTAD – Dia 14 di november proximo ta Dia Mundial di Diabetes y e aña aki Aruba One Happy Island Lions Club a scoge pa hiba un campaña di prevencion di e malesa Diabetes door di informa, educa y concientiza nos comunidad riba e malesa aki y a pone un enfasis riba nos muchanan.
Diabetes ta un epidemia global cu ta afecta hende homber, muher y muchanan diariamente rond di mundo. Diabetes ta un di e causanan principal di malesa cardiovascular, ceguera, problema cu riñon y amputacion di pia. Ta ser calcula cu un 629 miyon di persona lo ta afecta pa aña 2045.
Club di Lions Interacional como organisacion di servicio comunitario ta comprometi na yuda resolve e problemanan mas grave na mundo. Bringa Diabetes ta un di servicionan global di e 5 areanan, cualnan ta un desafio grandi pa nos humanidad y como Lions Club nos ta kere cu ta nos deber pa enfrenta esaki.
Diamars mainta Miembronan di Aruba One Happy Island Lions Club hunto cu Dr. Dellanire Maduro tabata na Paulus School caminda Dr. Maduro a duna un presentacion hopi informativo y educativo riba Diabetes concientizando nos muchanan riba un alimentacion saludabel y un bida activo.
Na Aruba actualmente nos tin 26 mucha cu diabetes tipo 1 y 1 mucha cu diabetes tipo 2.
E meta di e presentacion ta pa empodera nos muchanan cu conocimento riba diabetes, pa reduci y preveni pa nos muchanan haya diabetes tipo 2 y a la ves conoce mas di serca kico diabetes tipo 1 ta, creando un ambiente na scol cu ta duna sosten, y miho entendimiento riba e tema aki.
E presentacion tabata interactivo y participativo, a papia riba diferente productonan manera yogurt, malta, juice, fruta, pastechi, pan, chips, lechi, softdrinks..etc, productonan cu ta wordo consumi diario y con pa haci uso di esakinan di un forma mas sabi. Tambe riba e beneficionan di realisa actividad fisico. E reaccion y partipacion di e alumnonan tabata estupendo.
Aruba One Happy Island Lions Club ta gradici dirigencia di Paulus School, docentenan pa brinda nos organisacion e oportunidad aki pa por a informa, educa y concientisa nos muchanan riba e tema aki. Un danki special na Dr. Dellanire Maduro pa por a prepara y presenta esaki. Na final di e presentacion tur mucha y docentenan a ricbi un appel regalo cu e mensahe “Biba saludabel di chikito pa bo goza di bo salud na grandi”, cual a ser parti pa tur mucha y docente di Paulus School. Alumnonan di klas 6 a haya un foyeto cu informacion pa nan hiba cas pa nan mayornan cual ta contene informacion di Come Bon y Haci Movecion cual ta cortesia di IBiSA.
