ORANJESTAD – Aunke e no ta mucho conoci, Mainstreet di San Nicolas a bira un WiFi Hotspot. Un otro desaroyo positivo cu ta cuadra cu e masterplan di hasi San Nicolas e Cultural & Heritage City di Aruba.
Algun aña atras Sr. Fraser tabata tin e honor di por a encarga di un projecto cu lo a trece WiFi pa Main Street di San Nicolas cuminsando for di e area di Promenade. E plan aki lo a duna hende un motibo mas pa bishita e Main Street di SN y alavez ora turista bishita e Murals y Sculpturanan cu Ministerio di Turismo tabata financiando lo nan por a saca potret y upload nan dibiaha pa tur conocir na cas mira kico tur Aruba y nos Cultural & Heritage City tin di ofrece.
Lastimamente Minister Otmar Oduber, e motor tras di e projecto, a tuma retiro di partido y e projecto no a ricibi sosten despues di su salida.
Fast Forward un tiki mas cu un aña, cu un gobierno nobo na mando y liderasgo nobo, ora Sr. Fraser a hasi pregunta over di e projectonan incompleto di e Cultural y Heritage City e noticia a sali cu e projecto di Wifi pa cayanan di San Nicolas ta haya ful sosten di MinPres y gabinete Wever-Croes.
Colaboracion di sector priva
E trabou pa encontra partners cu ta willing pa colabora pa hasi e projecto posibel a reanuda. Manera den pasado nos tabata tin mester di doño di edificio cu ta willing pa colabora pa pone antena y negoshinan cu ta dispuesto pa host e equiponan aki ariba gasto propio.
Esaki tambe a logra y pueblo por duna un danki grandi na Yiu di Tera Store, Massive FM, Arubus, y Setar pa e ayudo, sponsorship, y colaboracion tremendo cu nan a duna na e projecto.
Desaroyo cu un meta
Awe e turista y local cu ta bishita cayanan di San Nicolas por subi WiFi gratuitamente for di Stacion di Polis te na e final di Arubus.
E projecto ta un balor agrega na e projectonan grandi di e Masterplan San Nicolas manera Hotel Secrets Baby Beach Resort cu lo celebra su groundbreaking November 14.
Otro projectonan di preparacion cu Sr. Fraser a guia ta e Solar Trees na San Nicolas cu ta ofrece 120v y USB chargers gratuitamente na tur bishitante den e Cayanan di San Nicolas, a instala diferente canvas pa hende por loiter den caya, a realisa e projecto di sculptura Lolita, y e projecto di sculptura di domino Changa ta on schedule pa cuminsa fin di November. Asina gobierno ta sigui cumpli cu e promesa hasi na pueblo di San Nicolas y Aruba pa desaroya e parti pariba di nos isla.
“Mi kier gradici AREA San Nicolas, Setar NV, ATA, Minister Otmar Oduber, Minister President Evelyn Wever-Croes, y Gabinete Wever-Croes pa tin nan curason den e lugar corecto y ta felicita pueblo di San Nicolas y Aruba henter”, Sr. Fraser ta clausura.