ORANJESTAD – Diabierna mainta Minister Ruiz-Maduro tabata den conferencia di prensa hunto cu demas colega Minister pa brinda informacion riba e reunion extraordinario di Conseho di Minister cu a tuma lugar na San Nicolas diamars cu a pasa. E meta di e Conseho di Minister extraordinario tabata pa den presencia di San Nicolas Business Association, scucha con lew e inciativanan comercial pa San Nicolas ta y tambe pa haya sa con Gobierno por yuda facilita e proceso pa asina e proyectonan por keda realisa pronto.
Minister Ruiz-Maduro a haci uso di e oportunidad pa felicita San Nicolas Business Association pa nan iniciativa pa facilita comerciantenan cu interes den San Nicolas. E mandatario a informa Pueblo riba e liason economico den persona di sr. Nassy cu a wordo poni na dispocicion di San Nicolas Business Association, pa asina fungi como punto di contacto directo cu Gobierno cu e meta pa facilita e iniciativanan comercial na San Nicolas.
Den e Maneho Economico pa Aruba 2019 -2022 cu a wordo lansa na principio di aña, e desaroyo di San Nicolas ta poni como un meta importante, pesey e mandatario ta contento di mira e desaroyo cu poco poco ta wordo realisa den proyectonan di hotel, restaurant, hardware store, appartments, proyecto di reciclahe, bingo hall pa nos grandinan y embeyisimento di e Caya Principal.
San Nicolas pa hopi decada tabata un motor tras di Aruba su desaroyo y awor ta momento pa nos traha hunto pa por bolbe realisa un desaroyo economico pa San Nicolas y vecindario.