Parlamentario Endy Croes a tuma nota di un conferencia di prensa di Mike de Meza e ex minister di finansas di AVP kende a desgracia finansas publico di e pais aki y ta autor hunto cu Mike Eman di e Mega Debe di cual awe henter e pueblo aki ta sufriendo. Poco poco pero sigur e Coalicion aki ta sacando e pueblo di e absimo cu Mike De Meza y AVP a laga atras. Mike de Meza lubidando e daño grandi cu e mes a ocasiona awor den menos di dos aña ta yora cu e ta comiendo malo y pa come malo mes ta hopi caro. Pues dunando indicacion cu su placa no ta yega. Mike de Meza por ta mas gentil y sincero y por a laga un otro colega kisas cu menos entrada trece e topico aki dilanti. Por a laga un Melvin “Donkey” Tromp kende a baha cu “VUT” kisas trece esaki dilanti.
Placa no ta yega Mike de Meza?
Cu tur respet pa tur dokter, casa di Mike de Meza kende ta un huisarts tambe sigur nos ta respeta pa su educacion y profesion. Pero Huisarts ta wordo paga rond di Afl. 40 mil florin pa luna. Parlamentario Croes a verifica lista di informacion di AZV cual te cu 2018 tin un total di 44 huisarts inscribi kendenan ta cobra hunto un suma di 23.5 MIYON pa aña cual ta alrededor di 40 mil averahe pa luna pa huisarts dependiendo cuanto patient bo tin cu un dak di 2875 patient maximo. Pues Mike de Meza mes ta cobra 8200 florin netto pa luna den su man, mas salario di su casa di 40 mil ta un bunita suma di 48 mil 200 florin pa luna. Pues net Mike de Meza kier bin critica cu e ta come malo pasobra su placa no ta yega?
Mike de Meza no tin credibilidad
Segun Mike de Meza ta ranca placa di pueblo pa paga family and friends. Mike de Meza por a splica cu cifra y documento pa e tin mas credibilidad? Djis grita den bashi no ta yuda bo. Mike de Meza a laga placa den caha di pais Aruba anto? Ta rastro di huña so a keda. Mike de Meza a aumenta e debe nacional den 8 aña cu 2200 miyon esta 2.2 BIYON florin. Ora Mike papia di Friends and Family, mi mester record’e e auto di careda di ruman di Mike Eman cu a haya mas di 1.6 MIYON florin for di ATA. Kende tabata traha na ATA como presidente di Board? Suegra di Mike de Meza? Asina mes: suegra di Mike de Meza. Pues abo Mike de Meza kier papia y acusa gobierno di friends and family? Corda cu ki ora bo papia algo percura pa bo tin documento pa substancia esaki. Bo mes ta pone nos reacciona riba bo e siman entrante anto cu tur documento alcaso pa pueblo mira con mentiroso bo ta.
Otro ridiculez di marca mayor
Mike de Meza a papia tambe di CBS. Ta net bou AVP a prohibi CBS pa nan saca rapport y informacion. Porfin tin un gobierno transparente awe cu ta contento cu CBS por genera datonan publicamente pa asina pueblo por compronde e magnitud di e desaster cu AVP a ocasiona y cu poco poco lo ta drechando esaki bek. Mike a papia cu criminalidad ta aumentando. Ta cual rapport Mike de Meza a lesa? Por fabor, presenta na trabou Mike anto trece e rapport ey Parlamento. Tin confirmacion cu 90% di casonan di atraco ta wordo soluciona awendia y high impact crime a baha enormemente compara cu temporada di Dowers cu tabata un free for all. Mike a bisa cu hendenan ta “bebe pa nan wanta nan hamber”. Con mas ridiculo bo por ta? Dentro di poco nos lo dedica un conferencia di prensa pa atende cu Mike.