Fraccion di AVP a manda pidi copia di dos contract cu Minister Otmar Oduber a bisa durante di reunion pa tratamento di ley di Serlimar, a firma cu dos compania pa loke ta trata maneho di desperdicio.
Lider di fraccion di AVP, sr Marlon Sneek, a mustra cu su fraccion a manda pidi copia di e dos contractnan cu Minister Oduber a papia di dje den prome tanda, caminda e minister ‘tussen de lippen’ a bisa cu lo tin un contract firma caba pa loke ta saneamento di dump di Parkietenbos y cu lo tin otro contract firma caba pa loke ta trata e ‘sanitary landfill.’
“Si e contractnan aki ta firma caba, nan tin cu wordo ehecuta y den e caso ey, Parkietenbos por wordo cera y no mester di e ley cu tin na Parlamento pa atende cu e situacion aki y si no ta asina, e minister aki ta mal informa Parlamento.
En todo caso nos fraccion a manda pidi e Minister pa e manda nos copia di e contractnan aki, pasobra tur biaha cu e Minister aki a bin den Parlamento den comision, caminda el a papia di e proceso di RFI, di su proceso pa yega na un incinerator.
Niun dia so el a papia di su proceso di bidding, kico tin cu haci pa bo por ta e ganado di uno: e ‘sanitary landfill nobo,’ dos: pa rehabilita e Parkietenbos cu nos tin awe.
Nos kier sa con e procesonan aki a bay y nos ta spera cu e Minister por manda nos tambe e contractnan cu a wordo firma cu esunnan cu a gana e bidding pa pueblo por haya sa kico esaki ta bay costa nos comunidad den su totalidad.
Un di e criticanan cu Raad van Advies tabatin, ta cu nan no ta mira un plan integral, ya cu minister ta bezig cu yen di cos los los, pida pida y pa kico mi no sa y pa tal motibo nos a manda pidi e documentonan aki pa asina nos por tin e informacionnan concerni.
Na mes momento nos por a tuma nota cu Minister Oduber ta bisa cu no ta berdad cu riba Cero Thijshi tin holor stinki pero nos a sinta cu parti di e comision di Parkietenbos y e comision aki a confirma na nos, cu e holor ta insoportabel.
Pa colmo e mesun Minister aki a confirma na Parlamento cu e contract cu a wordo firma pa pone liners y pa pone e pipanan pa haci flaring, no a wordo instala, pues tin un contract firma for di luna di Mei di 2018, pa pone liners y pipanan pa flaring pa kima gasnan cu ta sali for di e sushi, esakinan no a wordo instala.
Tambe nos a haci pregunta si a paga y ken a cobra y pakico e cosnan aki no a wordo instala y awe nos ta tende cu e ta bay costa hopi mas pa por remedia e situacion cu tin, caminda tabatin un contract.
Un hende mester a cobra ya cu den e contract ta poni cu mester paga 50% adelanta for di luna di Mei di 2018 el a wordo firma, kiermen mi ta imagina cu e persona aki a cobra su placa pero awor nos ta mira cu ni e liners y ni a tubonan pa haci e parti di flaring, no a wordo haci y ni poni.
Nos por a scucha Minister tambe papia den parlamento cu e ley di Serlimar no tin nada di haber cu incinerator pero Shonnan, as we speak e Minister ta bezig cu ‘limited tendering.’
El a manda yama 11 grupo y e grupi ako ta dunando nan oferta pa fin di luna y si mi no ta ekiboca e ganado mester ta conoci caba.
Pesey e ley di Serlimar ta na Parlamento, pa bay cobra sector priva, pa bay cobra turista, pa bay cobra esunnan cu tin otro compania di sushi cu ta busca nan sushi un suma adicional di 120 florin extra pa aña.
Tur esaki pa haya placa pa por paga e incinerator aki y ta di lamenta cu Minister no ta sincero y bisa comunidad realmente kico ta locual su persona ta haciendo.
Pa nos sigur ta di lamenta cu cada biaha e minister ta trata di hustifica e edificio cu el a huur for di su sponsor na Pos Chikito, ya cu trahamento di meubels cu palet ta conoci masha tempo caba aki na Aruba, por bisa 100 aña pasa caba.
Awe di repente mester a bin un luga na Pos Chikito cu ta costa e pueblo aki pa e parti di Serlimar so, sin hinca e parti cu mester paga pa City Inspector, caminda e parti di Serlimar ta costa 50 mil florin pa luna.
Tur esaki pa un sponsor di e Minister caminda Serlimar nunca tabatin mester di paga huur ya cu e tabatin su propio edificio y e unico novedad cu tin na e edificio di 50 mil aki, ta cu nan a cuminsa traha meubels di palet.
Awor hasta bishita di algun scol na e seccion di Serlimar aki, ta motibo cu e Minister ta haya cu ta bon pa pueblo paga 50 mil florin pa luna na sponsor di su partido,” Parlamentario Marlon Sneek a declara.