Parlamentario Endy Croes e siman aki lo manda un carta pa Parlamento pa cancela su biahe di trabou y cu e peticion pa Griffier manda notifica Secretario di Parlatino di su decision. Segun Parlamentario Endy Croes como vice presidente di comision di “Asuntos Politicos” tin un reunion riba agenda pa 7-9 di november proximo. Como vice presidente of presidente di cualkier comision ta di vital importancia bo presencia pa asina atende e topiconan cu ta riba agenda. Den e caso aki Parlamentario Endy Croes por a tuma nota di e lista di Parlamentarionan cu ta biahando pa e fecha ariba menciona tanto Benny Sevinger, Robert Candelaria y Arthur Dowers di AVP nan nomber ta aparece riba dicho lista.
Clan di AVP ta biaha business class
Parlamentario Endy Croes ta sigui splica cu semper cu el a asisti na reunionnan na Parlatino – mayoria parti na Panama – el a exigi Parlamento pa cumpra su ticket den clase economico esta un ticket di alrededor di Afl. 800 florin y ta sinta patras den avion cu tur pasahero. Sinembargo por tuma nota cu e “Clan” di AVP incluyendo Benny Sevinger “sospechoso” principal cu 5 cargo den e caso di AVESTRUZ , Robert Candelaria tur a exigi ticket den “business class” cual tin un costo di casi Afl. 3000,- pa persona. Parlamentario Endy Croes na promer lugar no kier subi avion cu ningun sospechoso. Y ta rechasa totalmente pa biaha cu Benny Sevinger den cualkier delegacion. Na di dos lugar no ta mira e sentido pa Parlamento mester paga tanto placa pa entre otro Benny Sevinger y Robert Candelaria bay Panama. Nan no tin ningun Voorzitterschap den ningun comision y como sospechoso Parlamento no mester ni paga pa Benny biaha. Ningun pero ningun hende por convence mi lo contrario.
Probechando di placa di pueblo
Parlamentario Croes ta mira esaki di tal manera cu como sospechoso bo mester rendi honor na nos instituto Parlamento y na bo mes. Ainda e presunto corupto Benny Sevinger ta sigui probecha di placa di pueblo. Parlamentario Endy Croes lo dirigi su mes na Griffier y na Presidente di Parlamento pa trata e caso aki cu urgencia den CHA esta Commisie Huishoudelijke Aangelegenheden, pa tuma un decision cu ningun Parlamentario sospechoso no por biaha representa Parlamento di Aruba riba custia di Parlamento. Parlamentario Endy Croes ta studiando e posibilidad pa manda un carta Parlatino tambe pa splica nan bou ki condicion Benny ta bayendo Panama y si Parlatino ta permiti un sospechoso oficial den corupcion den tipo di reunionnan asina.
AVP ta keda burla di nos sistema
Aparentemente tin rumornan fuerte cu lo tin cuentanan bancario na Panama den e caso di AVESTRUZ y kisas Benny ta usa placa di Parlamento como smoke screen cu conocemento di Candelaria pa bay trata na stroba e investigacion andando? Kico ta e rol di Candelaria den esaki? Nos a compronde cu tanto na Panama y Miami tin cuentanan bancario cu a move hopi placa den e caso di AVESTRUZ. Parlamentario Endy Croes ta indigna con sospechoso di AVP ta keda burla di nos sistema y ta biaha riba custia di Parlamento den business class manera nada no a pasa.
Parlamentario Endy Croes ta termina bisando cu e lo keda haci su trabou pa para e bagamunderianan aki di AVP. Simplemente NO POR!