Historia di Aruba:
Historia tey pa nos siña di dje y pa no comete e mesun errornan di pasado. E historia aki lo por sirbi como un les pa hopi persona cu actualmente ta bibando den un relacion den cual obsesion, abuso y maltrato ta tumando lugar, pa no tuma esaki mas y busca ayudo, prome cu ta laat. No keda pordona, paso nada no lo cambia.
Susesonan di Aruba tambe ta forma parti di e historia di nos isla. Aruba tin su historia, bunita y menos bunita, su historia alegre, su logronan grandi, pero tambe tin su parti di historia tristo.
Esaki ta un parti di e historia tristo cu nos isla a yega di experiencia. Un crimen pasional cu a sacudi Aruba den aña 1975.
Crimennan pasional ta keda sosode na mundo y tur dia nos ta lesa cu polis mester a bay interveni den problema di pareha, tur dia nos ta keda lesa noticianan den cual homber of te hasta muher tin biaha ta maltrata su pareha.
E problema ta cu e homber of e muher no kier acepta of compronde cu e relacion a yega na su fin. Celos, obsesion y maltrato tabata, ta y lo keda presenta den relacion di cierto parehanan y esaki por caba fatal.
E articulo aki di Historia di Aruba, ta basa riba un crimen pasional cu a sosode na aña 1975. Tabata trata di e homber L.M. y e dama B.R.
Door di Respet pa e miembronan di famia cu ainda ta na bida, nos no lo publica nan potret, ni nomber of fam. Esun cu conoce e historia aki, lo por deduci di cua pareha ta trata. Nos a dunanan un nomber fictisio, nos a yama e homber Pedro y e dama Maria.
Na 1931 a nace un mucha homber L.M. y na 1936 a nace un mucha muher B.R. ambos tabata e prins y prinses di nan mayornan. Segun nan tabata crece, na un edad basta jong destino a ponenan crusa den otro nan caminda. Esaki tabata amor a primera bista.
E pareha aki a drenta un enlace matrimonial y a haya yiu
Na 1951 Maria cu apenas 15 aña di edad a casa cu Pedro di 20 aña di edad. E prome 5 aña di nan bida matrimonial tabata e parti mas felis, den e prome 5 añanan, e pareha a haya yiu, pero despues di e 5 añanan bunita aki, e pareha a cuminsa haya hopi problema y pleito etc. E bida cu na inicio tabata mustra un eterno Luna de Miel, a haci un cambio drastico y ambos a bay di acuerdo pa divorcia.
E amor entre e pareha aki semper tabata fuerte y despues di dos aña cu nan tabata divorcia, e pareha no tabata por sin otro mas y nan a dicidi di bolbe bek cu otro, nan a bolbe casa y a haya mas yiu.
Maltrato, obsesion y abuso
E relacion, sali di un amor grandi, a cuminsa conoce obsesion, Pedro tabata obsesiona cu Maria. Problema nunca tabata falta den nan relacion, te hasta ela yega asina leu cu Pedro a cuminsa na maltrata Maria fisicamente, e maltrato a bay for di man, na momento cu Pedro a maltrata Maria cu un cuchiu, lagando e gravemente herida, Maria a hera perde su bida den e maltrato aki.
E amor a sigui, na 1974 un biaha mas nan a divorcia pa motibo cu aparentemente Maria lo tabata infiel, pero e pareha cu no tabata por sin otro, a papia nan problema y a bolbe bek cu otro.
Pedro no tabata gusta pa Maria lesa carta y dal betro
Despues cu nan a bolbe bek cu otro, Pedro kende tabata un mecanico di profession, no tabata gusta cierto cosnan cu su señora tabata haci, locual mas tabata pone Pedro rabia masha hopi mes, tabata cu Maria tabata mira futuro pa hende, esta Maria tabata un lesado di carta y tambe cu Maria tabata gusta dal betro. E biaha aki no a dura cu problemanan a bolbe start entre nan.
Feria na Santa Cruz
Riba un Diasabra anochi den e luna di Oktober 1975, Pedro a dicidi di fia un revolver for di su ruman, cu un intencion te na e momento ey desconoci pa su ruman. Ela bay e Feria cu semper tabata wordo teni na Santa Cruz. Eynan ela dal algun cerbes y e tabata mira hopi mama cu nan yiunan, mesora su pensamento a dal riba Maria, mama di su yiunan.
Pedro kier a papia desesperadamente cu Maria
Pedro desesperadamente a dicidi di subi su auto y bay San Nicolas na e cas unda Maria y su yiunan tabata bibando den Nijhoffstraat. Ora ela yega pariba, tur hende tabata drumi caba. Pedro a cuminsa bati duro riba e porta di cas y tabata pidi pa papia cu Maria, pero Maria no tabata kier a papia mas cune. Maria yen di miedo a core bay na su bisiña, cu tabata ey cerca mes.
Maria a keda riba su NO
Pedro a logra drenta paden y a bay cerca su yiu homber, despues di un rato Pedro a bay pafo y Maria inocentemente a kere cu Pedro lo a bay, Maria a dicidi di bolbe bek su cas. Pedro no a bandona e cas, y a drenta bek paden, paso e tabata insisti pa papia cu Maria. Ela roga Maria na tur forma pa nan papia, pero Maria a keda riba un No. Den e cas e momento ey tabata tin un otro persona cu a bisa Pedro, cu Maria no kier papia mas cu bo y pa e compronde, pero asina mes Pedro a keda insisti tur esaki sin resultado.
Fin fatal
Pedro den su desesperacion pa papia cu Maria y mirando cu Maria no kier a dirigi ni un palabra den su direccion, a pone cu Pedro bira asina razo, cu ela perde cabes. Den su furia ela saca e pistol cu ela fia di su ruman y a los e prome tiro den direccion di Maria. E bala a alcansa Maria, pero despues di e prome tiro aki, ainda Maria por a cana. Maria herida y spanta a core bay den cushina, Pedro a bay su tras y den cushina ela los e di dos tiro y esaki a resulta fatal pa Maria, e ‘amor’ di Pedro a cay riba vloer y a fayece mesora den cushina di su cas.
Pedro a desaparece pa algun dia
Mesora despues cu ela los e tiro fatal, Pedro a realisa kiko ela caba di haci y a spanta, mesora ela bandona e cas. Pa algun dia, niun hende no tabata sa di su paradero. Ela bay sconde pa autoridad, durante e dianan tabata transcuri, polis a haci varios buskeda, pero tur sin resultado, te ariba un dia, cu polis a haya un tip cu Pedro lo ta scondi na Warawara, mesora polis a bay den e area aki, pero no a topa cu Pedro. Ariba e mesun dia aki a bolbe drenta mas tip cu Pedro lo tabata scondi na Barranca Cora na Fontein, atrobe polis a bay, pero tambe sin resultado. E polisnan no a entrega, nan a sigui busca Pedro, ariba e mesun dia aki cu e tipnan tabata drenta, den careda di 8’or y mey di anochi, polis ta haya e tip di oro, cu Pedro ta na su cas na Macuarima.
Team di polis buscando Pedro
Mesora un team di 8 polis a cuminsa recore e area aki, den careda di 9’or y mey a di anochi a drenta un informacion adicional cu Pedro ta den su cas na Macuarima, pa nan bay na e cas na Macuarima. Mesora e polisnan encarga cu e caso aki a pidi refuerso di mas coleganan di warda di Polis na San Nicolas, Warda di Balashi y mas polis di warda na Oranjestad, como 17 polis a rondona e cas y via Alto Parlante nan a logra comunica cu e personanan cu tabata den e cas e momento ey.
Pedro a keda deteni
E cas na Macuarima tabata pertenece na Pedro y e tabata huur e cu un amigo. Na momento cu polis tabata tin e cas rondona e amigo di Pedro tabata tin bishita di un otro amigo, Pedro tambe tabata den e cas e momento ey. Polis a pidi Pedro pa no trata na scapa paso nan tin e cas completamente rondona caba. E dos personanan, cu tabata e amigo cu ta huur e cas y su amigo a sali pafo y a laga Pedro su so den e cas. Pedro a lock tur porta y a cera e bentananan, e tabata tin un pistol Beretta den su poder e momento ey. Pedro tabata cana cu e pistol punta na su cabes.
E polisnan tabata tin miedo pa e comete suicidio. E Polisnan na e sitio a cuminsa papia cune y bise cu ta miho p’e entrega su mes, pero nada no por a pone cambia di idea. Hopi mas laat , un primo y un ruman di Pedro a bin cu e mama di Pedro na e sitio, pero asina mes nada no tabata cambia su idea, te na momento cu via un porta di patras polis a logra drenta y a domina Pedro. Ela keda mesora deteni y e polisnan a hay’e cu e pistol y cu bala den dje.
Pedro mester a presenta dilanti hues
Pedro a wordo encarcela y mester a presenta dilanti mesa berde pa e asesinato di Maria, mama di su yiunan. Fiscal a pidi 16 aña di castigo pa Pedro, su abogado Tjon a bin cu un defensa hopi fuerte y bisando cu Pedro lo ta sufri di un enfermedad mental ‘Dwangneurose’. Maske e abogado a hiba un defensa hopi fuerte, asina mes Pedro a haya un castigo pisa. Segun un miembro di famia a informa nos, cu Pedro lo a keda mas cu 10 aña cera y cu despues di a recobra su libertad, algun tempo despues elo a comete suicidio.
Pedro no por a biba cu e horibel desicion cu ela tuma na 1975 di asesina e muher cu e tabata stima, cu ta mama di su yiunan.
Pedro muy probablemente lo tabata un homber cu tabata obsesiona cu Maria y tabata tin e pensamento “Si bo no por ta pa mi, bo no lo ta pa niun otro”.
Un fin tristo, obsesion probablemente lo a hunga un rol hopi cruel den bida di e pareha aki, cu por ta lo tabata stima otro, pero obsesion lo a domina esaki y asina a destrui nan for di otro, na un forma hopi tristo y cruel. E tata den su rabia no por a ni pensa riba su yiunan e anochi di 19 pa 20 di Oktober 1975, e yiunan a perde no solamente nan mama, pero nan tata tambe. Nan mester a deal cu e tristesa, cu e dolor, cu e perdida di nan mayornan. Con a para cu nan y ken nan ta actualmente no ta conoci pa nos.
