Zeewijk – Diabierna for di oranan trempan di marduga bou un vigilancia estricto di varios unidad y tambe cu ayudo di Militarnan Hulandes, a hiba e 2200 kilo di Cocaina pa kima.
Autoridad a subi e tereno di Citgo area di Zeewijk y te na parti mas pabou a cuminsa na kima e droga. Na e sitio tawata presente miembronandi Ministerio Publico.
Na entrada di e Gate tawata polisnan di varios departamento fuertemente arma.
Proceduranan aki ta masha normal tur parti di Mundo, ora cu autoridad ta deshaci di lotenan grandi di droga.
Pa nos recapitula, e lote miyonario aki a wordo haya ariba un Tugboat yama Gracia, cu a sali for di Cartagena Colombia. Ela wordo intercepta pariba di Aruba y a wordo ordena pa drenta Waf di Oranjestad.
Informacionnan cu a circula ta papia di un “Tip” cu autoridad lo a haya.
Cinco homber a wordo deteni, entrenan e Capitan.
Loke ta remarcabel cu te cu awe niun detenshon a tuma luga ariba Aruba mes !
Siendo cu e Tugboat Gracia a sali direccion Aruba.
E droga lo mester a wordo intercambia ariba lama of na costa norte, paso hamas e lote ey por a drenta waf sin wordo detecta.
Diabierna mainta despues di a kima e lote miyonario “tur hende” por ta trankilo y sin nervio. E lote grandi aki a spanta autoridadnan local mes, unda cu a cambia e cargamento confisca tres biaha !