Diaranson 23 di october oficialmente Minister di Desaroyo Teritorial, Infrastructura y Medio Ambiente Otmar Oduber a haci entrega di e decreto nacional cu ta traspasa e Parke Marino su maneho pa Parke Nacional Aruba. Esaki ta encera cu den e proceso cu a tuma luga durante e ultimo lunanan, a consulta cu comunidad y varios stakeholder (usuarionan, piscadonan, companianan di deporte acuatico etc.). Pa poco poco por a crea un plan di maneho.
Importante den esaki tabata pa e plan di maneho cu ta wordo ehecuta ta uno flexibel y vigente pa un periodo relativamente cortico (dos aña). Pakico? Pasobra a pesar cu tabatin envolvemento grandi di comunidad pa por a prepara e plan aki, ta consciente tambe cu lo tin mas interaccion cu lo tuma luga considerando cu e ta algo nobo cu ta keda introduci y su importancia. Pues ta laga espacio pa por trece mas adaptacion riba e plan, pa despues traha riba uno pa largo plaso (cinco of dies aña). E plan di maneho cu lo ehecuta, ta enfoca riba conscientisacion na comunidad di locual kier logra, kico kier proteha y con pa haci esaki hunto.
Minister Oduber ta gradici cada persona, organisacion, stakeholders, GOs, y NGOs cu a traha hunto pa realisa e momento aki.