Pos Chikito – Diabierna 18 di oktober ultimo, Aruba completo a wordo sorprendi anochi pa un noticia cu nos sa mira pasa solamente na otro partinan di Mundo. Nunca nos a pensa di mira algo asina.
Tawata diabierna anochi den careda di 11’or cu informacionnan a cuminsa drenta di algo cu nos no por a imagina y of realisa e momento ey. Dos auto a cay for di e brug nobo di Green Corridor.
Manera nos a trece caba den e noticianan anterior, milagrosamente ningun persona a perde nan bida mirando e haltura cu nan a cay for di dje. Esaki a sosode na momento cu un Altezza no a regula su velocidad na tempo y ta dal tras di un Nissan Tiida pushando esaki contra e Vangrails, cu lo mester a wanta e auto, pero esaki a kibra y cu consecuencia cu ambos auto a bay cay for di mas cu 10 meter di halto.
Un total di 5 persona a wordo transporta pa Hospital, entrenan un criatura(mucha muhe).
Pa su diasabra mainta ambos vehiculo a wordo saca y treci ariba. E caminda for di e rotonde di Pos Chikito a wordo cera pa asina trabounan di pone Vangrails nobo por a cuminsa, debi cu tawata peligroso, pa e parti caminda aki keda cu vangrails kibra y parcialmente sin vangrails.
Calidad di Vangrails
Despues di e accidente mesora por a scucha varios persona ta cuestionando dicon e vangrails no a wanta e autonan.
Diasabra mainta por a mira un team armando vangrails nobo na e sitio unda e accident a tuma lugar, na e calidad di staal bo tawata mira e diferencia. Algo cu a hala nos atencion tawata cu esaki a wordo haci na man, o sea cu te unda nos por a mira no a usa niun machine pa sigura nan den tera, tambe di cerca por a mira cu e schroefnan y demas material tur a wordo haci manualmente.
Ariba un di e imagen por mira un di trahado cu loke ta parse un pata di cabra cobando un buraco pa hinka e patanan di e vangrails den tera. Indicando cu un gran parti di e trabou a wordo haci manual y mirando e velocidad cu e autonan ta core riba e caminda aki, e vangrailsnan aki poni manualmente sigur no por ta adecuado pa e pida caminda prome cu e cuminsamento di e brug. E vangrailsnan aki lo por tawata bon, si tawata tin djes mondi su tras y no un cuminsamento di un brug cu un profundidad di mas cu 10 meter.
Segun normanan Europeo, vangrailsnan ta suppose di por wanta Truck y tur otro auto.
Claro un muraya di beton lo ta ideal pa truck, pero pa un auto di famia esaki sigur por ta fatal, pa motibo cu elo por pone e auto bolter.
Pa un Brommer, vangrails ta forma un peliger mas grandi ainda, debi cu e patanan hinka den e tera sin papia di e otro partinan por fungi manera cuchiu pa e motociclista na momento cu e haye envolvi den un accidente.
Hopi placa a wordo usa pa construi Green Corridor, pa a traha e brug cu sigur a keda hopi bunita, pero kizas no a pone tino riba cierto detayenan, areanan cu mester a haya extra atencion pa siguridad den trafico, cu lo por a evita manera loke a pasa diabierna ultimo. Vangrails, e palabra ta bisa pa su mes, nan ta rails pa wanta of gara, e autonan, pa evita nan pasa bay.
Nos no ta kere cu kizas lo bin mucho cambio eybanda(area di e brug) pa loke ta e infrastructura.
Loke si por of lo mester haci ta pone borchinan riba un distancia hopi mas prome cu e brug, avisando cu e caminda ta manera un bocht y cu e ta peligroso, pa asina e chauffeurnan regula nan velocidad na tempo y pone extra atencion riba e caminda evitando asina mas accident.
Ta ora pa tanto Architectnan y Ingenieronan sinta na mesa y busca un solucion ariba corto plaso, prome cu e baca hoga y hendenan perde nan bida. Diabierna 18 di Oktober tawata dos auto di famia y 5 persona herida, milagrosamente e no tabata un accidente fatal, mirando den ki estado e Tiida a keda.
Si tawata un Bus a perde control eynan awo, kiko e ora, e vangrails cu no ta sirbi pa e ara aki, sigur cu no por a ni wanta un auto di famia, sigur no lo wanta un bus of truck.
Lo ta bon pa e parti na cuminsamento di e brug haci manera den exteriornan, nan ta pone dobbel vangrails y bols nan den beton, asina evita cu e ta kibra facilmente, of pone e railsnan geel di hero manera tin riba e brug. Mas sigur e Ingenieronan y architectnan lo por sa kiko ta miho pa haci cu e caminda aki, pa asina e bira mas sigur y pa evita cu mas auto lo por cay for di e haltura aki.
Pueblo tin e derecho di por sinti’e sigur momento cu e subi nos carteranan.