Kuerpo Polisial di Korsou ta informa: Kaso di tiroteo ku dos herido.

Willemstad, Korsou: Djamars 15 di òktober 2019 alrededor di 09.21 or sentral di polis a haña notifikashon ku tin un kaso di tiroteo a tuma lugá den área di Roodeweg i ku tin dos hende heridá. Na yegada di e promé patruya polisial nan a bin topa ku dos hòmber drumi abou ámbos ku herida di bala na varios parti di nan kurpa. Ku urgensia a transportá tur dos víktima pa poliklínika di SEHOS pa asistensia médiko. For di investigashon preliminar ku polis a realisá na e sitio, a sali na kla, ku un ratu promé un hòmber ku kapuchon bisti a sali for di e santana na Roodeweg i los algun tiru dirigí riba e víktimanan, ku e resultado ariba mensiona. Na e sitio polis a haña i konfiská varios huls prosedente di e tiroteo. Motibo di e tiroteo no ta konosi i ta den investigashon.