Oranjestad – Dialuna mainta autoridad a intercepta e Tugboat Gracia y a trece den Waf di Oranjestad.
Eynan cinco tripulante a wordo deteni, aparentemente nan lo ta di nacionalidad Venezolano.
E boto a wordo hiba despues Savaneta Kamp, unda e Steunpunt di Kustwacht na Aruba ta ubica.
Durante oranan di mainta pa merdia varios departamentonan di Husticia a rista e boto por completo y manera nos a trece dialuna anochi caba, cu autoridad a bin descubri 2200 kilo di Cocaina puro.
Investigacion
Segun informacionnan cu nos ta dispone di dje ta, cu tur cinco miembro di tripulante lo mester pasa den procesonan intensivo di interogacion.
Den tipo di casonan asina ta papia di oranan largo di interogacion, di parti autoridadnan local. Cual sigur hopi overtime lo mester wordo traha y paga.
Esaki ta sin conta tur loke a wordo confisca abordo, e cos mas importante ta cellular, via e cellularnan autoridad por haya sa cu kende nan tur nan tawata tin contacto ultimo na Aruba.
Pues si autoridad a logra pone man ariba un of mas cellular, esta si nan no a haya chance pa benta nan den lama. Via e cellularnan, autoridad sigur lo haya sa mas y asina lo por yega na pone man riba esnan cu ta envolvi den e traficacion grandi di Cocaina aki, cu dia 9 di Oktober a sali for di Cartagena, Colombia rumbo pa Aruba.
Tin un indicacion fuerte cu e intercambio di droga di boto pa boto lo mester a tuma lugar riba lama, pa motibo cu e Tugboat no a notifica cu e tabata na altura di Sero Colorado y sigur mas cu logico, e no por drenta nos wafnan cu un cargacion inmenso asina di droga sin wordo detecta pa Douane.
A base di documentonan haya abordo, autoridad sigur lo mester por haya un pista y asina nan por haya sa unda pa nan cana. Mirando cu no ta trata aki di un cantidad insignificante, sino di 2200 kilo di Cocaina puro, na balor di miyones y miyones di dollars.
Si tur cos marcha mane mester ta, algo lo mester sosode masha lihe mes, por ehempel entradanan hudicial y detencion /nan lo mester cuminsa tuma luga.
Aki ta papia di un cargacion miyonario di droga cu a gone wrong, caminda cu si ela logra subi tera ta masha hopi placa tur e banda envolvi lo mester a cash in.
Tambe danki na un tip cu autoridad a haya na momento cu e boto aki a sali for di Cartagena, esaki a ponenan ta mas atento riba e barco aki, cu nan por a intercepta e tugboat prome cu nan entrega e droga.
Organisacion criminal
Den casonan manera esaki ta hopi hende tin envolvi, cu mester wordo bon paga pa coopera.
Dus den e dianan nos dilanti nos mester tende di no un pero varios detencion rond di Aruba y na cierto puntonan clave, of ta djes confisca e droga, anto ta cera e 5 miembronan di tripulante y that’s it.
Ban mira con bon y duro nos Husticia/Autoridad ta traha den combatimento di bandanan di crimen organisa y traficacion di droga, cu ta causando hopi sufrimento na famianan di adictonan di droga y tambe tin hende cu ta bibando riba nan nivel di educacion/econmico of di nochi pa mainta di un hende humilde ta bira un ” miyonario”.
Nos tin pleno confiansa den nos Cuerpo Policial cu lo traha duro pa desbarata e organisacion criminal aki, cu lo mester a ricibi e lote gigantesco di droga riba nos isla. Hopi biaha Aruba ta wordo usa como trampolin pa traficacion di droga pa Merca of Europa y esaki sigur ta causando daño na nomber di Aruba.