Willemstad, Korsou: Relashoná ku e atrako ku morto ku a tuma lugá den mardugá di 26 di sèptèmber último den Kanga kaminda un señora di edat a pèrdè su bida, Polis huntu ku Ministerio Públiko ta realisando investigashon den e kaso aki. Ta trata di e kaso di atrako, unda ku den oranan trempan di mainta riba e dia en kestion, a bin topa e dama di edat morto riba su kama.
Pa logra di pone man mas lihé ku ta posibel riba e malechornan, ta hasi un súplika na komunidat pa koperá ku suministrashon di informashon den e kaso aki. Ministerio Públiko huntu ku famia di e víktima a pone un rekompensa di 10 mil florin disponibel, na e informashon ku por kondusí na solushon di e kaso aki.
Pa duna tep riba e kaso aki, por yama e number anónimo di polis 108. Kuerpo Polisial i Ministerio Públiko ta konta riba yudansa di komunidat pa por solushoná e kaso aki tambe.
