J.E.IRAUSQUIN BOULEVARD – Diasabra anochi autoridad a wordo informa cu lo tin problema entre dos Gang, y cu un miembro di un di nan lo tin un machete.
Tawata mas o menos 11’or di anochi cu varios unidad policial a bay Palm Beach Plaza, na unda dos grupo di hoben lo kier enfrenta otro.
Loke a pone polisnan yega na e sitio mesora y den cantidad grandi ta e hecho cu lo tin machete envolvi.
A busca den area y altura di Sbarro a topa cu algun hoben cu lo ta pertenece na un di e gangnan.
Eynan agentenan a papia serio cu nan, pero no a haya ningun machete den nan poder.
A bisanan tambe pa move di eybanda y busca caminda di cas, evitando cualkier problema serio pa nan mes.
No ta prome biaha cu tipo di problema manera esaki ta surgi na e Mall ey y/of den e area aki.
Nos ta den temporada di Herfst Vakantie, pues e fluho di hobennan ta mas halto cu normal eybanda.
Y manera semper, ta “nan” so sa kiko ta E problema cu otro.