Parlamentario Endy Croes a tuma nota di un silencio hermetico di Mike Eman, e lider di AVP kende a coopera pa corumpi nos sistema y desgracia mi pais y boso pais Aruba. Durante 8 aña di gobernacion di AVP poco poco na un manera structural a manipula na promer lugar nos conciudadanonan cu promesanan falso pa asina haya e confiansa y control unda despues sistematicamente a corumpi nos sistema pa nan corupcion y fraudenan por a tuma lugar. Mike Eman banda di a habri man y habri cranchi laga nos finasas publico wordo atraca na un manera inhusto den man di e dos burdugonan Mike de Meza y Bermudez kendenan lo mester bay den historia como personanan Non Grata pa Aruba.
Actonan coruptivo
Mike Eman a permiti Benny Sevinger corumpi y abusa di terenonan y patrimonio di pueblo. Un clan incluyendo Leoncita, Gaby, Freddy y un primo di Benny entre otro tabata algun den e Clan cu tabata fiesta cu patrimonio di pueblo. Pueblo por corda e propaganda na radio di Leoncita “Haci mi Miyonario”? Wel literalmente esaki nan tabata practica. Benny ta firma ‘akkoord conform verzoek’ tur caminda. Un persona ta bay pidi pa un tereno comercial y nan ta bis’e cu e tereno cu e kier ya caba nan a duna un otro hende. Pero si bo kier e tereno bo por papia cu e persona cu tin e tereno. Asina nan amigonan ta bin den wega. Leoncita por ehempel ta core manda un carta den pura pidiendo e tereno como optie. Como ehempel un carta pidiendo tereno fecha 20 di augustus 2015 ta wordo ingestempeld na kantoor di Benny dia 7 di augustus 2015. Pueblo ta compronde cu e carta aki a wordo ingestempeld promer cu el a wordo traha? Asina pura nan tabata traha y asina hopi eror nan tabata comete den nan actonan coruptivo. Benny Avestruz (AVPTRUZ) Sevinger ta firma mesun carta aki y ta skirbi abou “Akkoord conform verzoek. Gaarne uw medewerking”. Anto e mes ta pone un fecha di 14 augustus 2015. Un biaha mas e fecha di e carta mes ta 20 di augustus 2015.
Ladron ta keda chikito
Asina tin masha hopi mas ehempel. Mas tristo ta e NV di Leoncita den e caso specifico aki cu a haci e peticion y a haya e optie cual despues a wordo bendi pa miyones no tabata ni existi y a lanta mas di un luna despues esta fin di september 2015. Manera PG Alexander van Dam a declara promer cu el a bandona Aruba na april 2019 cu banda di caso IBIS unda a horta masha hopi comerciante a cambio di permiso (Paul Croes, ex candidato di AVP) e casonan andando ta mucho pero mucho mas grandi cu e caso IBIS. Kisas e tempo ey nos no a compronde ainda pero awor cu a cuminsa haci inval na Aruba y Corsou y a haci inval den cas di ex minister Benny Sevinger por bin compronde cu muy probablemente ta na e caso aki esta caso Benny Avestruz PG tabata referi.
Mike Eman ta riba Mute
Si awe AVP kier tilda mundo cu ta persecusion politico lo ta bon pa e fanaticada y sostenedornan di AVP tuma pasenshi y lesa tur documento cu pronto lo bira publico unabes e caso aki yega corte. Mescos por lesa e rekisitor di fiscal den caso di Paul Croes. Parlamentario Endy Croes ta sigui splica cu AVP ta sinonimo na un partido di “Boef”. No por pensa otro. Ta hopi pero hopi daño material AVP a causa na e pais chikito aki di mi soño esta Aruba. Straño si cu Mike Eman ta sali bay manifesta ora maestronan di scol ta manifesta, of ora CAFT skirbi algo e ta den prensa Mike ta bin dilanti cu discurso nacional of ora Meta Corp a subi caya mesora Mike ta brinda sosten pero desde diamars ultimo Mike Eman ta riba “mute”. Parlamentario Endy Croes ta pidi pueblo poco mas pasenshi pasobra e bala a cuminsa lora y na final nos tur lo bay wak si enberdad Benny Avestruz Don’t Give a Damn!!!