Un regalo di Prome Comunion awe a resulta den unico sanctuario di cabay na Aruba. E trata di un esfuerso inicia pa Frederique Drost cu sosten di su casa, Oliver de Jong. Hunto nan a lanta e fundacion Equine Sanctuary Aruba, ESA cu ta carga e nomber Faye Ranch. Faye Ranch ta dirigi na e rescate di cabaynan malo, zwak of hasta mal trata.
“E nomber ta basa riba unda nos tabata biba, na Houston. Nos adres tabata Faye Road, y eynan mi tabata traha cu un sanctuario di cabay tambe, “ Drost a splica.
Frederique Drost a nace y a lanta na Hulanda y semper tabatin interes den cabay. Su mayornan a regal’e un pony dia cu el a haci su prome Santa Comunion, Parinka, cu e mester a comparti cu su ruman chikito. Pero despues el a haya su propio cabay, Lightfeet, mesun nomber cu e cabay den e serie di buki popular di mucha, Arendsoog. Di e tempo ey, el a enfoca su mes riba nan cuido y tin mas di 40 aña ta traha cu e animalnan.
E profesion di su casa a permiti e famia de Jong/Drost biba rond mundo, incluso na Aruba. Despues di un periodo na Merca, a scohe pa biba permanentemente na Aruba y a cumpra un cas cerca di Parke Nacional Arikok cu ta brinda hopi espacio pa a lanta un sanctuario. Pasobra esey semper tabata e pensamento di Frederique.
E trabou a cuminza cu ayudo di su casa y yiunan, pa prepara e tereno yena cu hubada, tuna y bringamosa, sera e tereno y prepara un espacio pa e habitantenan special por sconde di solo. E prome dos cabaynan cu a bin keda na Faye Ranch tabata Olympia y Rocky. E prome enfoke di Frederique tabata pa traha riba e pianan di e cabaynan. Lamentablemente no por a yuda Olympia, cu tabatin hopi dolor. Awe Prince ta compaña Rocky. Faye Ranch lo no por tuma mas cu cuater cabay pareu, simplemente pasobra e espacio no ta suficiente pa mas.
Pakico e pianan
Drost ta un specialista di hoef. E ta un specialismo unda ta trata e pianan y e ‘huñanan’ di cabay y hasta burico. E hoefnan ta mas importante pa salud di e bestianan aki cu hende ta kere y door di pone zapato di hero bou nan, no solamente ta debilita nan, pero a lo largo ta afecta e nervionan cu ta conecta e pianan di e animal. Door di e hero, e pianan ta debilita ya cu nan no ta sinti e piso, e vloer, e tera mas. Consequentemente, cabaynan por desaroya artritis y hopi sufrimento, segun Drost.
Al contrario, un cabay of burico no mester di un hero bou nan hoef, cu ta di e mesun material cu huña, pues ta crece. Movecion natural ta tene e crecemento bou control. Tanto cabay como burico como tal mester di hopi espacio pa nan move y asina tene e hoef bou control, na un forma natural. Un cabay mester di cana un minimo di 16 kilometer pa dia pa su hoef keda bou control y no crece y bira un problema. “Mester compara e hoef como un huña, pero cu ta necesario pa cana riba dje. E huña por sigui crece si no keda feil’e. Un zapato di hero ta manera un acrilico riba un huña di hende. Despues di tempo e acrilico ta debilita y daña huña. Pero contrario na hende, un cabay mester di dje pa wanta su peso. Y riba dje, e hoef ta sigui crece cu e hero, y ta deforma cu tur consequencia pa e animal. Ademas, “un zapato di hero, un hoefijzer, ta hasta kita stabilidad di un cabay. Un cabay por slip masha lihe door di e hero,” Frederique a conta. Es mas, door di e hero, e cabay ta experiencia mas di 800 biaha e impacto ora di cana, compara si e no tin e zapato di hero.
Frederique como tal, ta sostene e tournan di cabay na Aruba, pasobra e ta un forma pa saca e animalnan pa cana. E ta urgi sinembargo, pa tene cuenta cu e horario, pa evita solo pisa y tambe pa cuida e pianan y particularmente e hoefnan. Pues pa tene cuenta cu e bienestar di e cabaynan. “Ideal, lo kita e heronan, pa evita slipmento y impacto fisico.”
E trabou ta hopi. Traha cu hoef afecta no ta facil y Frederique ta tene henter un record di tur locual e ta haci y ta saca potret pa mustra e progreso. Na e momentonan aki e ta traha cu un of dos voluntario, y aunke cu veterinarionan ta yuda, nan no ta specialisa den e tipo di trabou aki. Sinembargo, Faye Ranch ta conta cu sosten di entre otro Wit Gele Kruis pa verband y otro necesidad. Y te cu awor, ta e famia de Jong mes ta paga pa tur cos. E speranza ta cu por haya mas sosten. Na e momentonan aki, por busca mest di cabay, a cambio di sea un appel of wortel pa duna e cabaynan pa come.
Pero mas cu tur cos, Frederique kier educa comunidad riba cuido di cabay y como tal ta bay habri porta pa muchanan di scol por bishita e rancho. Di e forma aki, muchanan por aprecia e balor di cuida un animal y tambe siña e importancia pa duna cabaynan e espacio natural necesario. E efecto di un cabay riba bida un hende por ta grandi.
Un cabay por trece trankilidad, y Frederique a nota esaki cu un hoben cu tabata yud’e na e rancho. Un hoben intrankilo, cu no por a bay scol cu a logra haya dominio riba su ansiedad entre otro door di yuda e cabaynan y a cambio, e inspiracion di e animalnan. Y aunke cu Faye Ranch no ta dirigi riba personanan cu autismo, muchanan den e spectrum, “esnan cu por anda cu bestia, lo por bishita tambe,” Frederique a splica.
En todo caso, e ta un proyecto mas cu ta enrikese nos pais, pa asina ilustra cu Aruba ta un luga cu por brinda amor y cuido na esnan mas vulnerabel, incluso cabaynan cu mester di mas atencion, sin crea impacto. Al contrario, Faye Ranch ta promove matanan local cu ta duna cuminda y sombra na e cabaynan y ta plama cuminda rond di e tereno pa stimula e animalnan pa cana. Den e dianan di calor tabata duna awa constantenan. Ademas di e cabaynan, Faye Ranch tin bij, galiña y cu e parhanan local manera Chuchubi, Gonzalito y Trupiaal, ta controla tambe e presencia di musca. Den otro palabra, e meta ta un operacion sostenibel sin cu mester uza insecticida y cu toch no ta crea molester.
Pa sosten, por tuma contacto cu Faye Ranch riba Facebook si kier haci trabou voluntario. Y pa donacion, bishita equinesanctuary.weebly.com